Pervi da la crisa da corona ha il president da Gastrosuisse Casimir Platzer grond respect da l’atun e da l’enviern. La fin dal mais è previs in terz inscunter cun il Cussegl federal.
Il president da Gastrosuisse Casimir Platzer ha ditg a las gasettas «Schweiz am Wochenende» che blers manaschis na vegnian betg a surviver l’atun e l’enviern, sche la situaziun cun limitaziuns e la gronda malsegirezza restia.
Blers gastronoms hajan duvrà lur reservas, entant che la recessiun haja gist pir cumenzà, ha Platzer ditg. Ed el fa attent, ch’era banchets, seminaris ed occurrenzas d’uniuns sajan stritgadas.
Regiuns alpinas
Vitiers fa il president da Gastrosuisse era quitads areguard la stagiun d'enviern ed ils manaschis en ils territoris da skis. Las consequenzas d'ina nova interrupziun fissian catastrofalas.
Platzer pretenda perquai dal Cussegl federal clerezza, tge che saja realisabel e tge betg. La fin dal mais datti in nov inscunter turistic cun il Cussegl federal.
