Siglir tar il cuntegn

Header

audio
Scumond da vender cigarettas a giuvenils n'impedescha betg ch'els fiman
Or da Actualitad dals 20.07.2021.
laschar ir. Durada: 1 minuta 59 Secundas.
cuntegn

Giuvenils e fimar Malgrà in scumond da vendita – giuvenils fiman tuttina

In studi svizzer mussa, ch'in scumond da vendita da cigarettas porta nagut tar ils giuvenils, blers dad els fiman tuttina. Midà è dapi il scumond però ch'il fimar na vala betg pli sco «cool».

80'000 giuvens e giuvnas svizras sut 21 onns èn vegnids dumandads davart lur opiniun e consum da cigarettas. Il studi da las Universitads da Basilea e Losanna ch'è vegnì fatg tranter ils onns 2001 e 2016, ha vulì savair, sch'in scumond da vendita da cigarettas fetschia ch'ils giuvenils fimian pli pauc.

Nagin connex

Dapi l'onn 2006 han blers chantuns introducì in scumond da vendita da cigarettas per persunas sut 16, respectiv 18 onns. Tuttina fiman anc adina 32% dals giuvenils e giuvens creschids en Svizra. Il studi ha chattà nagin connex tranter il scumond ed il consum da cigarettas dals giuvenils. Quai declera in dals iniziants dal studi Alois Stutzer uschia:

Enstagl da cumprar las cigarettas al kiosk, survegnan ils giuvenils quellas dals collegas.
Autur: Alois Stutzer Professur d'economia a l'Universitad da Basilea

Tge ch'è dentant sa midà è l'opiniun dals giuvenils. Tenor il studi n'èn persunas che fiman, sco era il fimar sez, betg pli uschè «cool» dapi l'introducziun dal scumond da vendita. Per ils giuvens e las giuvnas è quai dentant tuttina nagin motiv da desister da la cigaretta.

Auter tar studis davart alcohol

Che da quels scumonds da vendita pon avair effects positivs, mussan studis americans davart il consum d'alcohol. Là valan quels scumonds da vendita enfin ch'il cumprader u la cumpradra ha 21 onns.

I saja dentant uschia, ch'ins consumeschia l'alcohol savens gist en il lieu, nua ch'ins cumpria el. Per exempel en l'ustaria, di Alois Stutzer. Uschia saja quai simpel d'evitar quest scumond.

RTR actualitad 12:00

Artitgels legids il pli savens