La facultad privata en Svizra è creschida sin in nov record. L'onn 2020 ch'è stà martgà da la crisa da corona è la facultad privata svizra creschida per quatter pertschient sin totalmain tschintg billiuns dollars. Quai resulta dal rapport da la firma da cussegliaziun «Boston Consulting Group». Uschia tegnia la Svizra radund 1,2% da la facultad globala.
Aczias e tschains bass
La raschun per l'augment saja cunzunt il boom al martgà d'aczias ed immobiglias ch'haja survegnì fieu tras la politica da tschains bass da las bancas centralas.
La facultad totala sa cumpona da la facultad finanziala (3,3 billiuns dollars; p.ex. aczias ed obligaziuns) e las valurs realas (2,8 billiuns dollars; p.ex. immobiglias) minus ils debits (in billiun dollars; p.ex. credits ed ipotecas).
Er sin l'entir mund ha la facultad privata cuntanschì cun 431 billiuns dollars in nov record.
