La quota d'abitaziuns libras, saja ida enavos l'onn passà da 5,8% sin anc 4,7%. Uschè bassa saja la quota stada l'ultima giada avant 10 onns. La raschun per la mancanza d'abitaziuns saja surtut ch'i vegnia bajegià damain. Vischnancas turisticas sentian uss cunzunt las consequenzas tardivas da l'iniziativa da segundas abitaziuns e quai cun tutta vehemenza. Dentant sentian er las citads grondas sco Turitg e Genevra che la purschida d'abitaziuns saja fitg restrenschida. Vitiers vegnia che la populaziun creschia, uschia ils auturs dal rapport. La branscha da construcziun na vegnia plinavant betg a daventar pli dinamica, almain betg avant il 2024.
Questa mancanza sco er l'inflaziun han chaschunà gia il 2022 ch'ils tschains èn s'augmentads. Er quest onn vegn quest trend a cuntinuar. Wüest Partner quinta cun in plus da 2% tar ils tschains chasa. Perquai ch'er il tschains da referenza per ipotecas vegnia a crescher, vegnian er ils tschains existents ad ir ensi.
Er cumprar vegn pli char
Er da cumprar abitaziuns saja vegnì l'onn passà pli char. Il pretsch per ina chasa d'ina famiglia saja creschì pervi dals tschains ipotecars pli chars sco er pervi dals pretschs annuals. Uschia pajan ins per cumprar ina chasa d'ina famiglia d'ina grondezza media uss radund 53'600 francs ad onn. Avant in onn avess ella anc custà 31'400 francs.
Il svilup haja sbassà la dumonda, fertant ch'il dumber d'objects per vender s'augmenta. Quai dentant betg perquai ch'i vegniss construì dapli, mabain perquai che possessurs vulan uss vender. Per ils 2023 vegn spetgà anc ina giada ch'ils pretschs s'augmentian per 1,7% tar chasas d'ina famiglia e 0,5% per abitaziuns da cumprar.
Or da l'archiv
