Guardà en general èsi da dir: 37% dals accidents da sport en Svizra capitan tar gieus da balla e 25% tar sports d'enviern. Questas cifras èn publitgadas en la statistica d'accidents 2020.
Sch'ins piglia mo ils sports d'enviern, lura èsi cler: Ils pli blers accidents datti cun ir cun skis sin pista (58%) e cun snowboard (12%).
La gronda part dals accidents sin pista capitan per atgna culpa. Be tar 6% dals accidents da skis hai dà ina collisiun cun in'autra persuna. Blessuras datti il pli savens tar ils schanugls, suandà da la bratscha. Blessuras da la chavazza ubain dal tscharvè èn percunter plitost raras cun 3%. Sche quai è ina consequenza dal fatg ch'adina dapli persunas portan chapellina, lascha la Suva avert.
Blers accidents levs
Quanta lavur ch'i dat per ils ospitals entras tals accidents è difficil da dir. In indizi è dentant la dumonda: Quant grevs èn quels accidents?
Per respunder questa dumonda differenziescha il Post svizzer per la prevenziun d'accidents (BfU) tranter trais categorias – tut tenor quant ditg ch'ina persuna blessada n'è betg capabla da lavurar (betg tenor quant ditg ch'ella è ospitalisada):
- Persuna lev blessada: Enfin 1 mais betg lavurar
- Persuna blessada mezgrev: 1 – 3 mais betg lavurar
- Persuna grev blessada: Passa 3 mais betg lavurar ubain renta d'invaliditad
Facit: Metter en relaziun il dumber da persunas sin pista, ils accidents e las ospitalisaziuns n'è gnanc uschè simpel. Durant l'enviern è ir cun skis bain il sport cun ils pli blers accidents – per gronda part èn quai dentant blessuras plitost levas, nua che las persunas na dovra probablamain nagin tractament sin ina staziun intensiva. Cunquai che quests letgs èn dentant stgars en il Grischun pon gia singuls accidents cun blessuras grevas ed in lung temp en l'ospital chaschunar problems da capacitad. Quants accidents e quant grevas blessuras ch'i dat durant in enviern, dependa plinavant da facturs nuninfluenzabels, sco l'aura ubain la naiv.
