Rasar ora la cuverta da picnic sin ina prada verda insanua en la muntogna svizra enstagl da rasar ora il sientamauns sper la mar en l'Italia, Spagna u Grezia. Empernaivels 20-25 grads enstagl da 35-40 grads en la sumbriva. Fin ussa sa profilavan cunzunt ils pajais scandinavs cun la purschida da «Coolcation». In pled che sa cumpona dals pleds englais «cool» = frestg e «vacation» = vacanzas.
André Aschwander da Svizra Turissem vesa che quai basegn vegn era pli e pli grond en Svizra. Fertant che destinaziuns turisticas sco il Vallais cun il glatscher da l'Aletsch u il territori da Lai – mo dus nums che Svizra Turissem menziuna – hajan da natira anora temperaturas agreablas, veglian era las regiuns en la Bassa far diever da quest trend.
Per exempel in bogn termal en l'Argovia ch'ha endrizzà bogns cun aua fraida, snow rooms e bavrondas fraidas per dar dumogn a la chalira.
Aria da muntogna en il Grischun
Tar Grischun Turissem saja «Coolcation» er in tema, dentant actualmain betg ina prioritad, di il pledader da medias Luzi Bürkli. Bain sa focusseschian els era sin ils avantatgs da vacanzas en la muntogna, tranter auter cun lur campagna «Bergluft» che promova hotels en lieus muntagnards. Campagnas per promover specificamain «Coolcation» na sajan dentant betg planisadas.
Svizra Turissem dat pli gronda paisa a quest trend, ma era lur pledader da medias, André Aschwander, menziuna che las vacanzas en lieus pli agreabels na remplazzian betg las vacanzas sper la mar.
-
Bild 1 von 2. Kandersteg-Sunnbüel en la Part Sura Bernaisa. Bildquelle: Svizra Turissem.
-
Bild 2 von 2. Il Pass dal Fuorn tranter Zernez e la Val Müstair. Bildquelle: Svizra Turissem.
Nagin turissem da massa pervia da «Coolcation»
Che quest trend carmalia da memia turists e turistas che surchargian ils lieus cun natira intacta, gliez na crai André Aschwander betg. La Svizra saja lunsch davent d'in turissem da massa sco quai che citads sco Venezia, Amsterdam e Barcelona hajan da cumbatter. E la finala giaja il trend «Coolcation» era bain a prà cun il grond trumf da la Svizra e quai ch'ella haja gia adina purschì: aria schubra e muntognas maiestusas.