Tip 1: Avrir las fanestras
Il suentermezdi èsi normalmain il pli chaud. Per ch'i restia frestg en l'abitaziun u il biro vali la paina da dar aria sur notg u la damaun baud e da serrar las fanestras uschespert ch'igl è pli chaud dadora.
Tip 2: Bavrondas tievias
Era sch'i carmala da baiver in'aua u ina soda fraida cun quadrins da glatsch n'è quai nagina sfradentada optimala. Meglier èn bavrondas tievias u almain mo levamain sfradentadas. Ellas na stizzan betg mo la said, mabain n'engrevgeschan era betg supplementarmain la circulaziun. Durant dis fitg chauds duai ins almain baiver var 2,5 liters aua – tgi che sua bler perfin dapli. Per far in zic pli gustus l'aua pon ins er agiuntar in zic citrona u schentsch.
Tip 3: Laschar circular l'aria
In ventilatur po far in zic pli agreabla la temperatura en stanza. Dentant adatg: Betg drizzar il ventilatur directamain sin il culiez u sin il chau. Uschiglio pon ins tschiffar in dafraid. Ina brisa miaivla vi dals pes u vi da las chommas po era gia gidar durant ina notg chauda da stad. Tgi che dovra la climatisaziun na duai betg programmar quella pli fraid che sis grads sut la temperatura externa – era quai per evitar in dafraid.
Tip 4: Pli gugent ina duscha tievia ch'in sigl en l'aua fradaglia
Strusch insatge è pli carmalant durant chauds dis da stad ch'in sigl en l'aua fraida. Dentant adatg: Quella po augmentar la pressiun dal sang e chaschunar in schoc. Ultra da quai sa tiran ils vaschs ensemen e tegnan uschia la chalur en il corp. La consequenza: suenter ch'ins è sfradentà, suan ins anc pli fitg ch'avant. Perquai vali la paina da far ina duscha tievia e suenter betg sa sientar dal tuttafatg. Uschia po l'aua svapurar ed ins sa senta frestg. Suenter la duscha na duessan ins betg trair en vestgadira stretga ord material sintetic mabain tscherner colurs cleras e material da mangola, bambus u glin.
Tip 5: Sfradentar las giugadiras dal maun
Il tric vegl ed enconuschent: Tegnair per in curt temp las giugadiras sut aua fraida. Cunquai che las avainas e las arterias èn circumdadas là da pauca pel, pon ins sfradentar effectivamain il sang che circulescha en il corp.
Tip 6: Metter ord funcziun apparats electrics
Apparats electrics procuran per ina chalur supplementara – e quai schizunt cura ch'els èn en modus da spargnar energia. Perquai vali la paina da duvrar uschè paucs apparats sco pussaivel e chargiar els la saira u la notg.