Indiscreziuns tranter politica e medias haja adina dà, di il cusseglier dals chantuns Stefan Engler. «Per las medias datti uschia era ils primeurs». Pli problematic vesa il politicher da l’Allianza dal Center las indiscreziuns sche persunas politicas vulan uschia influenzar ad auters acturs or da la politica. Dentant na vesa el betg en il mument in problem extraordinari tar ils leaks da corona. I saja entant plitost in cas in pau pli spezial che saja dad examinar.
Da sclerir saja uss la vart giuridica che la procura publica e londervi. Latiers vegnia tge che indiscreziuns muntan per la collegialitad en il Cussegl federal e la dumonda sco che las indiscreziuns pon disturbar la lavur parlamentara, uschia Engler. Quai saja impurtant da sclerir.
Jon Pult: nagin grond scandal politic
Per la cussegliera naziunala da la partida liberaldemocratica Anna Giacometti fiss la situaziun ferm problematica sche i sa conferma che las infurmaziuns èn vegnidas dadas enavant cun sistem. Anc pli problematic fissi sch'il Cusseglier federal Alain Berset vess savì da quai.
In grond scandal politic na dettia en quest mument, di il vicepresident da la partida socialdemocratica Jon Pult. I na detta entant nagin che ha gì in dischavantatg. Dentant na saja betg cler sche tut saja ì en maniera correcta da la vart da las instituziuns. Perquai saja quai era bun che las cumissiuns da gestiun dals cussegls hajan decidi dad intercurir il Cussegl federal sco tal e betg mo il departament dad Alain Berset.
Per il mument n’ha dettia quasi nagins fatgs. E quai che vegnia fatg or da las paucas infurmaziuns ch'èn avant maun en chaussa saja ina campagna cunter Berset ed era la PS. Oravant tut las renfatschas ch'il Cusseglier federal sa duaja retrair.
