Dapi dus dis debattescha il Cussegl naziunal davart la dumonda sch'i duai dar novas ovras atomaras u betg. Bunamain 100 oraturas ed oraturs èn s'annunziads per prender posiziun. Era sch'ins ha spetgà per oz in resultat n'èsi betg vegnì a quel. Il Cussegl dovra anc temp e cuntinuescha glindesdi proxim la debatta.
«L'iniziativa da Blackout» deriva dals Giuvens liberals svizzers, la PPS, l'Uniun democratica federala e divers represchentants da l'economia.
Tar questa ha il Cussegl federal fatg ina cuntraproposta che vul era ch'ins possa bajegiar novas ovras atomaras. Il Cussegl dals chantuns ha gia discutà davart questa proposta e sustegna questa.
Jon Pult, il cusseglier naziunal da la Partida socialdemocratica è persvadì che metter sin energia regenerabla è la via correcta. Novas ovras atomaras manassan tenor el tar dapli problems che soluziuns. Per l'ina fissan ovras atomaras memia charas e vegnissan memia tard per la segirezza da provediment. E per l'autra fiss la Svizra lura pli dependenta da auters stadis sco per exempel la Russia.
Nus augmentassan nossa dependenzas da stadis da carugnas sco la Russia.
Ils socialdemocrats pledeschan ensemen cun la Verda e verd-liberals per bajegiar ora las energias regenerablas, accumulaturs e raits intelligentas per segirar il provediment.
La Partida liberaldemocratica e la Partida populara svizra vesan in enorm potenzial en l'energia atomara – uschia era Christian Imark, cusseglier naziunal da la PPS. El argumentescha cun la prestaziun da las ovras atomaras existentas.
Beznau, Leibstadt e Gösgen produceschan durant ils mais d'enviern 40% fin 50% da tut il provediment d'electricitad en Svizra.
E quai fetschian la ovras da tuttas uras – quai na possian ins betg cuvrir cun energia regenerabla. Tranter auter era perquai che cunter blers project vegn fatg recurs.
Opiniun dal Center – la vusch decisiva
Sch'i duai dar novas ovras atomaras u betg è ina dumonda da dretg e sanester. La partida dal Center n'è betg d'accord tar questa dumonda. Ina pitschna maioritad è per abolir il scumond.
La discussiun ch'ha procurà per debattas vivas e nua che duas ideologias èn fruntadas ina sin l'autra n'è betg a la fin cun la debatta en il Cussegl naziunal. La populaziun svizra vegn a decider en chaussa.