Il project è vegnì refusà en la chombra gronda cun 121 encunter 64 vuschs e 5 abstenziuns. La PPS, la PS ed ils verds han vuschà encunter il project, dentant or da differents motivs: Per la Partida populara svizra va in scumond da reclama da products da tubac per uffants e giuvenils memia lunsch e per la sanestra memia pauc.
Avant bundant dus onns ha il suveran svizzer acceptà l’iniziativa «Uffants senza tubac». Quella ha l’intent da scumandar reclama da products da tubac per uffants e giuvenils. En il parlament vegn uss debattà davart ils detagls da la regulaziun.
Entant che la dretga vul far differentas excepziuns per promover tubac per exempel a festivals è la sanestra strict per in scumond da reclama.
L’onn passà aveva il Cussegl dals chantuns debattà e schlucca la proposta ch’il Cussegl federal aveva fatg. Cun quai ch’il Cussegl naziunal ha refusà il project va quel ussa puspè enavos en il Cussegl dals chantuns.
