Represchentants dad 83 pajais èn s'inscuntrads ier a Tavau per discutar davart la pasch en Ucraina. Resultats concrets n'hai betg dà tar quests discurs.
Sco quai che Andrij Yermack, il manader da l’uffizi presidial da l'Ucraina ha declerà dumengia saira a Tavau hajan ins gì bunas discussiuns e saja perina davart blers puncts impurtants sco l'independenza da l’Ucraina, l'integritad territoriala e la suveranitad dal pajais. Era sche betg tuts eran da la medema opiniun saja el persvas che l'Ucraina haja grond sustegn per la furmla da pasch ch'il president Wolodimir Selenski ha elavurà. La finamira saja in plan communabel, tge che pretendia entant discurs cun la Russia. Quella n’era betg stada da la partida als discurs, ed era la China betg. Sco quai che Andrij Yermack ha punctuà saja quella envidada – ed ins envidia la China era per discurs futurs.
Gia suenter la mesadad da l’inscunter aveva il cusseglier federal e co-president da l’inscunter Ignazio Cassis discurrì avant las medias. El ha punctuà ch’i saja impurtant ch'i dettia in consens internaziunal e ch’i vegnia insumma agì. Simplamain spetgar saja nagin’opziun. Tenor Ignazio Cassis, che ha manà l'inscunter ensemen cun Andrij Jermak da l'Ucraina fiss i stà in success sche quels 83 pajais pudessian discurrer cun ina vusch. Dentant n'è quai betg gartegià.
La conferenza da reconstrucziun a Lugano saja stada la basa per ils discurs. La rumida da minas umanitara en l'Ucraina saja plinavant da gronda impurtanza. A lunga vista saja la finamira d'er involver la Russia en ina furma u l'autra en ils discurs, ha Cassis plinavant ditg.
Sper l'Ucraina èn era sa participadas als discurs la Brasilia, la Tirchia ed ils Emirats Arabs Unids. En il center dal plan è la «furmla da pasch» dal president ucranais Wolodimir Selenski. Il president ucranais vegn spetgà il mardi al WEF. Igl èn gia ils quarts discurs davart pasch en l'Ucraina en questa furma.
