En var dus onns duain tut ils abitants e las abitantas da la Svizra avair access a l’internet a bindel ultralad. La spertadad da download duai porscher 80 Mbit per secunda, e l’upload duai succeder cun 8 Mbit per secunda. Actualmain è il minimum fixà tar 10 respectiv 1 Mbit per secunda.
L’augment da la spertadad minimala da l’internet gidia questas persunas, che vivian en regiuns nua ch’il martgà na porschia betg talas offertas, scriva il Cussegl federal.
Iniziants èn da principi cuntents cun la proposta
Avant var dus onns ha la Cumissiun per traffic e telecommunicaziun inoltrà la moziun. La proposta ch'il cusseglier federal ha preschentà il venderdi, è la resposta sin questa moziun e sin giavischs dals chantuns. In ch'è s'engaschà fitg per questa chaussa è il cusseglier naziunal dal Grischun, Martin Candinas. El è da principi cuntent cun la proposta. Ma ins stoppia restar vi dal ball.
Quai è mo in pass. Igl è impurtant d'adina puspè s'adattar al svilup tecnologic, e da guardar ch’il foss tranter citad e campagna na vegn betg pli grond.
La consultatziun da la proposta dal cussegl federal va enfin la fin mars 2022.
