Postinas, curriers da velo u persunas che portan ora gasettas èn organisadas actualmain en trais associaziuns. In contract da lavur collectiv (CLC) per la branscha na datti betg. Quai vulan sis purschiders da posta midar, sco i ha num en ina communicaziun. Tranter auter vulan La Posta e l’interpresa logistica Planzer fundar ina nova federaziun da patrunas e patruns «Distribuziun Svizra». Ensemen cun ils sindicats Syndicom e Transfer duai la nova federaziun tetgala instradar tractativas per in contract da lavur collectiv che duai garantir standards minimals en il sectur dals servetschs postals.
Valaivel per tut ils servetschs tenor lescha da posta
Quest nov contract da lavur collectiv duai valair per tut tgi che porscha servetschs en il senn da la lescha per la posta. Quai cumpeglia spediziuns fin a 30 kilograms. Il CLC duai tranter auter era includer servetschs da distribuziun da gasettas, gasettas gratuitas e reclama, era sche quests na correspundan en sasez betg a las pretensiuns da la lescha da posta.
Patruns e sindicats quintan da suttametter il CLC al Cussegl federal en il decurs dal 2022. Lez decida davart declerar il CLC obligatoric per il sectur.
