Jean-Daniel Ruch duai coordinar davent da l'auter onn la politica da segirtad da la Svizra. Quai ha il Cussegl federal decidì venderdi, suenter che Ruch ha savì persvader il pli fitg ina cumissiun da tschintg persunas. 39 persunas han candidà per quest post – 29 umens e 10 dunnas. Ruch ch'è actualmain ambassadur en la Tirchia e ch'è stà pli baud cussegliader da la schef-accusadra da l'ONU, Carla Del Ponte, è vegnì nominà sco secretari statal.
La raschun ch'ins ha stgaffì quest nov secretariat è la guerra en l'Ucraina. Il departament da defensiun numna Ruch in profund expert dal sistem da politica da segirtad.
In profund expert da la politica da segirezza
Davent l’emprim da schaner 2024 surpiglia Ruch la direcziun dal nov Secretariat da stadi per la politica da segirezza (Sepos). La ministra da defensiun Amherd ha designà Ruch sco «profund expert da la politica da segirezza svizra, tant en l'administraziun sco er en il servetsch diplomatic».
Dapi ses studi lavura el en quest champ ed ademplescha cumplainamain il profil d'exigenzas per la funcziun sco secretari da stadi cun ses attest da prestaziun, sias experientschas e cun sias scolaziuns e cun ses perfecziunament.
En spezial haja el experientscha da direcziun operativa e strategica e sa famigliariseschia fitg bain cun ils andaments da la politica e da l'administraziun publica sin plaun federal. Ruch duai garantir a partir da l'onn proxim ina politica da segirezza coerenta da la Confederaziun e rinforzar uschia la segirezza en Svizra.
Represchentant dad Amherd en l'exteriur
Il nov Secretariat da stadi vegn furmà dal Departament federal da defensiun, protecziun da la populaziun e sport (VBS) sco autoritad civila e suttastat directamain a la ministra da defensiun. A partir da l’emprim da schaner 2024 vegn Ruch a manar var tschient collavuraturas e collavuraturs. El surpiglia tranter auter incumbensas d'enfin ussa dal Secretariat general e d'ulteriurs posts dal VBS e vegn per exempel a represchentar Amherd en gremis internaziunals. Era vegn Ruch ad esser responsabel per il rapport da la politica da segirezza.