L'onn 2021 hai dà dubel uschè bleras attatgas da cyber en Svizra che l'onn avant. Quai annunzia il center naziunal per segirtad da cyber. En tut haja dà enturn 22'000 cas. Il pli savens haja dà emprovas d'engion e da extorsiun cun criptar datas. Bleras attatgas n'hajan betg gì success. Il center per segirtad smina dentant, ch'i dettia anc bler dapli cas, perquai ch'i na dat nagina obligaziun d'annunziar attatgas da cyber.
Ina raschun per quest augment pudess era esser il nov formular d'annunzia, che vegneva simplifitgà la fin da l'onn 2020. Quel saja dapi lura era pli prominent sin la pagina iniziala. Dentant haja propi era dà dapli attatgas.
E-mails malsegiras
Il pli savens haja dà emprovas d'engion e da extorsiun cun criptar datas. Era attatgas da Phishing prendian tiers, nua ch'il attatgader annunzia ch'ins survegn in pachet u ch'i dettia problems cun la distribuziun. Sch'ins clicca sin quest link, lura vegn'ins sin ina pagina nua ch'ins stoppia inditgar il numer da credit. Sper e-mails vegnia era empruvà cun SMS.
Ils attatgaders vegnian adina pli raffinads ed investeschian pli bler temp tar ina persuna per obtegnir la fidanza.
