La Migros ha fatg marcantamain damain gudogn l'onn passà. Quel è sa reducì sin 175 milliuns, 60% pli pauc cumpareglià cun l'onn avant, communitgescha il concern. La raschun per quest resultat sajan tranter auter ils custs per materia prima, energia ed embelladis che creschian. Plinavant haja il concern stuì prender a mauns rectificaziuns da valur da 500 milliuns francs. I sa tractia da projects d'IT ed immobiglias da logistica ch'hajan ina pli pitschna valur che bilantschà.
Tgi che cumpra SportX e Melectronics vegn enconuschent la stad
Durant la stad vul la Migros dar enconuschent tgi che cumpra ils dus martgads spezialisads SportX e Melectronics. I dettia dentant gia uss bunas novas per las emploiadas ed emploiads: er suenter la vendita vegnan las stizuns manadas vinavant cun lur persunal. Quai ha ditg ils nov schef da la Migros Mario Irminger en l'intervista cun l'AWP.
Era Hotelplan e Mibelle vul la Mirgos vender. Là sajan ins dentant anc betg uschè lunsch en il process da vendita. Las emploiadas ed ils emploiads duain vegnir infurmads fin la fin da l'onn davart lur novs possessurs. Per las persunas che perdian lur plazza, dettia in plan social, ha ditg Irminger. La finamira saja dentant da vender Hotelplan e Mibelle sco entir.
Sco raschun per la vendita da quests martgads spezialisads, ha ditg il schef da concern ch'ins veglia sa focussar sin mangiativas, il commerzi da non-food, las prestaziuns finanzialas e sanadad.
