Siglir tar il cuntegn

Header

audio
Lètg per tuts: Co èsi uss propi?
Or da Actualitad dals 28.09.2021.
laschar ir. Durada: 04:19 minutas.
cuntegn

Lètg per tuts Tge munta quai uss?

La dumengia ha la Svizra decis da lubir la lètg per tuts e tuttas. Ma tge mida quai uss per perins omosexuals, e tge resta sco quai ch'igl era. Ina survista.

En emprima lingia munta la decisiun dals votants e da las votantas che tuts e tuttas dastgan maridar. I na dat betg pli il partenadi registrà per pèrs omosexuals, mabain be pli la lètg. Pèrs che vivan gia en in partenadi registrà dastgan transfurmar quel en ina lètg, na ston dentant betg.

Adopziun per tuts

En Svizra dastgan be pèrs maridads adoptar in uffant. Uschia dastgan uss er pèrs omosexuals maridads adoptar in uffant. Fin ussa eri be pussaivel d'adoptar l'uffant dal partenari en in partenadi registrà, dentant betg in'adopziun en general.

Donaziun da sems

Da nov dastgan era pèrs lesbics survegnir donaziuns da sems. Enfin uss dastgavan be pèrs eterosexuals maridads survegnir ina donaziun sche l'um era nunfritgaivel u sch'i deva ina ristga per grevas malsognas geneticas. Mintga donatur da sems è registrà tar l'Uffizi federal per fatgs dal stadi civil. Mintg'uffant naschì tras ina inseminaziun ha il dretg da savair tgi ch'il donatur è stà cura ch'el u ella ha 18 onns.

Donaziun da cella d'ov e maternitad substitutiva

Vinavant betg pussaivel è la donaziun da cellas d'ov u la maternitad substitutiva. In pèrin na po pia betg engaschar ina dunna che porta ora in uffant. Quai è reglà en l'artitgel 119 da la Constituziun federala. La maternitad substitutiva n'è il mument era betg tema en il parlament. La cussegliera naziunala da la Partida verd-liberala Katja Christ ha dentant inoltrà in'iniziativa parlamentara da legalisar la donaziun da cellas d'ov analog a la donaziun da sem. Giuridicamain na dettia nagina differenza tranter quellas duas donaziuns.

In ulteriur punct che sa mida per pèrs omosexuals e ch'il parternari u la parternaria estra po nizzegiar la natiralisaziun facilitada.

RTR actualitad 08:00

Artitgels legids il pli savens

Scrollar a sanestra Scrollar a dretga