Siglir tar il cuntegn

Header

Il Cussegl naziunal.
Legenda: Il Cussegl naziunal ha debattà ditg davart l'iniziativa che vul far fin cun la libra circulaziun da persunas cun l'Uniun europeica. Keystone
cuntegn

Libra circulaziun da persunas Cussegl naziunal ha discutà ditg

L'iniziativa da limitaziun che vul abolir la libra circulaziun da persunas cun l'UE ha procurà il glindesdi per lungas discussiuns en il Cussegl naziunal. Auter che la PPS han tut las partidas defendì la via bilaterala da la Svizra cun l'UE.

Enfin tard viaden la saira ha il Cussegl naziunal discutà il glindesdi davart l'iniziativa dal pievel da la PPS che vul far fin cun la libra circulaziun da persunas tranter la Svizra ed ils pajais da l'Uniun europeica.

Sch'ils votants e las votantas schessan Gea a l'iniziativa, lura avess il Cussegl federal in onn temp per negoziar da nov ils contracts bilaterals e d'excluder la libra circulaziun da persunas. N'avess quai betg da gartegiar, stuess el visar la cunvegna. Novs contracts che garantissan ad esters la libra circulaziun fissan lura scumandads.

Iniziativa metta en privel il bainstar

Gist quai mettia en privel la via bilaterala che haja contribuì al bainstar da la Svizra, ha argumentà la cussegliera naziunala cristiandemocratica, Ruth Humbel. Pervi da la clausula da guillotina crudassan tar in Gea a l'iniziativa era gist las ulteriuras cunvegnas da las bilateralas 1.

Tema da surpopulaziun

Il cusseglier naziunal Adrian Amstutz da la PPS ha percunter tratg endament il privel d'ina Svizra cun 10 milliuns abitants. Quai muntass er dapli CO2, dapli rument ed in consum d'energia pli grond. La Svizra stoppia perquai puspè sezza decider, tgi che dastgia vegnir en Svizra e tgi betg.

Perquai ch'il Cussegl naziunal n'ha betg tractà a fin la fatschenta il glindesdi saira, vegn l'iniziativa discutada vinavant la mesemna da l'emna che vegn. Davart l'iniziativa sto silsuenter anc il Cussegl dals chantuns decider. Il Cussegl federal è gia s'exprimì cunter l'iniziativa. Avant il suveran svizzer vegn l'iniziativa probabel la primavaira 2020.

Video
Debatte gegen Personenfreizügigkeit
Or da Tagesschau dals 16.09.2019.
abspielen

RR novitads 06:00