I na saja betg be ina lingua che na vegnia betg pli instruida, di il cusseglier dals chantuns socialdemocratic Baptiste Hurni. La Svizra è in pajais cun quatter linguas ed ins stoppia avair premura da quellas e sa sfadiar da mantegnair quai per la coesiun.
Jau chat quai fitg privlus per nossa cultura e noss pajais.
Baptiste Hurni ha inoltrà en il parlament ina moziun che vul che la Confederaziun sto perscriver d’emprender ina segunda lingua naziunala en scola primara.
Andrea Caroni, cusseglier dals chantuns da la PLD vesa quai auter. El sez discurra pliras linguas ed appreziescha quai. El è dentant da l’avis che la discussiun enturn il franzos en scola primara vegnia survalitada.
Jau chat la discussiun totalmain survalitada.
Tenor Caroni vegnia celebrà sin las spatlas dals uffants la coesiun. Relevant saja tenor el da far la dumonda tge san ils uffants cura ch’els èn ord scola. La dumonda cura ch'i duain emprender la lingua, saja ina dumonda pedagogica. Tenor el duain ins valitar tenor quels criteris cun quants onns ch’ins emprenda ina segunda lingua.
La moziun da Baptist Hurni pudess avair bunas schanzas en il parlament. Il Cussegl federal propona da dir Gea a quella. Probabel è dentant che la discussiun ch'è planisada oz en il Cussegl dals chantuns vegn spustada sin la proxima sessiun. Ina dumonda da trametter enavos la moziun a la cumissiun per tractar il tema en detagl è numnadamain sin maisa.
