Siglir tar il cuntegn

Header

video
«Ina normalisaziun durant la stad è realistica»
Or da News-Clip dals 21.04.2021.
laschar ir
cuntegn

Livestream Cussegl federal ha concretisà strategia per ils proxims mais

La strategia cuntegna trais fasas suenter las qualas la gronda part da las mesiras da corona vegnan schluccadas. Quant ditg che questas singulas fasas cuzzan, dependa da las singulas gruppas da populaziun e dal decurs da las vaccinaziuns. Quest model è uss en consultaziun tar

  • L'emprima fasa è la «fasa da protecziun»,
  • la segunda è la «fasa da stabilisaziun» e
  • la terza ed ultima è la «fasa da normalisaziun».

Cun questa via vul il Cussegl federal pussibilitar il return a la normalitad.

Fasa da protecziun: Vaccinar persunas spezialmain periclitadas

  • Durada: Enfin che tuttas persunas spezialmain periclitadas èn vaccinadas (sche tut va bain, fin matg)
  • Situaziun: Per controllar la pandemia èn mesiras severas necessarias. Entras il testas duain tantas persunas asintomaticas sco pussaivel vegnir chattadas per interrumper chadainas d'infecziun.
  • Mesiras pli severas sche: Il Cussegl federal ha definì valurs directivas per decider mesiras pli severas. L'incidenza da 14 dis: Betg dapli che 450 infecziuns novas per 100'000 abitantas ed abitants. Ospitalisaziuns en media da 7 dis: Betg dapli che 120 letgs sin staziuns intensivas entras patieztas e pazients da Covid-19 sur 15 dis: 300 letgs. La valur R na po betg esser sur 1,15.
  • Schluccadas: Pervi da las schluccadas dals 19 d'avrigl e la situaziun epidemiologica fragila, n'èsi betg da spetgar ch'i dettia enfin ils 26 da matg ulteriuras schluccadas.

Questa fasa cuzza enfin cura che tuttas persunas ch'èn spezialmain periclitadas e vulan quai, èn er vaccinadas. Quai munta han survegnì omaduas dosas dal vaccin. Uscheditg che la prontadad da laschar vaccinar è en questa gruppa tar 75%, parta il Cussegl federal dal fatg che questa fasa va a fin la fin matg 2021. Ils 12 da matg vul il Cussegl federal evaluar da nov la situaziun ed trametter en consultaziun in ulteriur pachet da schluccadas.

Fasa da stabilisaziun: Vaccinar pussaivel per l'entira populaziun creschida

  • Durada: Enfin che l'entira populaziun da creschidas e creschids che vulan, èn er vaccinads (ca. fin fanadur).
  • Situaziun: Entras las vaccinaziuns duess il dumber d'ospitalisaziuns e da cas mortals sa sminuir cuntinuadamain. Tar in augment da vaccinaziuns è dentant da quintar ch'er il dumber d'infecziuns s'augmenta puspè perquai che l'acceptanza per las mesiras da protecziun sa sbassa. In augment da cifras d'infecziun nuncontrollà pudess puspè metter en privel il sistem da sanadad.
  • Mesiras: Las valurs directivas èn las medemas sco en la fasa da protecziun.
  • Schluccadas pussaivlas: A scolas autas duai puspè dar instrucziun da preschientscha (sch'i vegn testà mintg'emna). Obligatori da far homeoffice vegn remplazzà cun recumandaziun (sche collavuraturas e collavuraturs testeschan regularmain). Schluccada da las capacitads en il commerzi en detagl. Schluccada da capacitads tar il sport e tut tenor er indrizs da temp liber. Tar ina fitg buna situaziun epidemiologica: ils restaurants er endadens.

Durant questa fasa n'èn anc betg vaccinadas tuttas persunas che vulan er quai. Experientschas dad auters pajais hajan mussà che gist dapli persunas vaccinadas hajan anc ina giada accelerà il svilup da la situaziun epidemiologica, perquai che l'acceptanza per las mesiras è ida a perder.

Durant questa fasa stattan a disposiziun grondas massas da vaccin. L'entira populaziun da creschids ha lura access ad in vaccin. Sche radund 60% da la populaziun è pronta da sa laschar vaccinar, è da parter dal fatg che tuttas persunas che vulan, survegnian almain l'emprima dosa enfin il zercladur. Cura che questa fasa vegn terminada, dependa da la populaziun. Ins possia dentant supponer che la vaccinaziun da tuttas persunas che vulan vaccinar duess ir a fin enfin la fin fanadur. Premissa è dentant ch'ils producents n'han betg ulteriurs problems da furnir vaccins.

Fasa da normalisaziun: Mesiras vegnan abolidas cumplainamain

  • Durada: Uschebain che l'entira populaziun creschida ha gì la pussaivladad da sa laschar vaccinar cumplainamain (cura che radund 30% da las plazzas da vaccinar restan avertas)
  • Situaziun: Er sche bleras persunas èn prontas da sa laschar vaccinar, restan bleras persunas betg protegidas (uffants u persunas che na pon betg laschar vaccinar). Perquai èsi pussaivel ch'il dumber da cas s'augmenta fermamain en questa fasa e ch'il sistem da sanadad pudess vegnir surdumandà. Igl è impurtant che persunas èn pertschertas dal ristg sch'i na sa laschan betg vaccinar.
  • Mesiras: Las mesiras sa drizzan al sistem da sanadad per che quel na vegnia betg surdumandà. Sch'il sistem da sanadad vegn en privel da vegnir surdumandà po il Cussegl federal er puspè decider mesiras da protecziun pli severas.
  • Schluccadas: Las ultimas mesiras da serradas da manaschis u instituziuns sco er limitas da capacitads duain vegnir schluccadas pass per pass. Mesiras da basa sco l'obligatori da mascras duain er vegnir schluccadas pass per pass per ch'il svilup da la pandemia possia vegnir persequità.
  • Persunas cun in certificat (vaccinà, guarì u testà dacurt) na duain betg pli esser pertutgadas da talas mesiras.
video
«Vaccinar è in act da solidaritad»
Or da News-Clip dals 21.04.2021.
laschar ir

Sche tuttas persunas creschidas che vulan quai èn vaccinadas cumplainamain, cumenza la fasa da normalisaziun. Il Cussegl federal è da l'avis ch'i na saja lura betg pli giustifitgà mesiras da protecziun severas en vista a la societad sco era l'economia. Las mesiras che resta duain durant questa fasa vegnir schluccadas zic a zic.

Er suenter che tuttas persunas che vulan, èn vaccinadas, vegn il virus a circular vinavant. Igl è da parter dal fatg che persunas che na sa laschan betg vaccinar e persunas che n'han er anc betg fatg tras la malsogna, vegnan a s'infectar. Pli grond ch'il dumber è e pli probabel ch'il dumber d'erupziuns vegn ad esser, ed er il dumber da persunas che vegnan ad avair in decurs nausch da la malsogna e pudessan murir pervi dal virus. Per evitar ch'il sistem da sanadad vegn surdumandà saja dentant fitg impurtant da sa laschar vaccinar en Svizra.

RTR novitads 15:00

Artitgels legids il pli savens

Scrollar a sanestra Scrollar a dretga