- Ina dunna da 74 onns è morta en l'Ospital universitar da Losanna.
- Ella saja stada periclitada ferm pervi d'ina malsogna cronica.
- La dunna era gia ospitalisada dapi ils 3 da mars.
- Sco nova mesira per proteger persunas periclitadas, cusseglia la Confederaziun da tegnair distanza in da l'auter
En il chantun Vad è l'emprima persuna morta dal coronavirus. I sa tracta d'ina dunna da 74 onns che haja gì in aut ristg, pervi d'ina malsogna cronica. La dunna è stada ospitalisada dapi ils 3 da mars. Quai han confermà la Polizia chantunala dal chantun Vad. Il suentermezdi vulan las autoritads orientar davart la situaziun en il chantun.
58 cas confermads
Sco quai che l'Uffizi federal da sanadad BAG scriva sin sia pagina d'internet datti la mesemna a las 17:15 en Svizra 58 cas confermads cun in'infecziun dal coronavirus. Tar ulteriurs cas manca anc il test dal labor da referenza a Genevra – la mesemna a mezdi aveva l'Uffizi da sanadad en quest connex discurrì da 39 cas. En pli dettia radund 200 cas da suspect e 300 persunas sajan en Svizra en quarantina. Quai vul dir che quellas persunas ston star en lur abitaziun e na dastgan betg avair contact cun autras persunas.
Daniel Koch ha gia ier declerà ch'i giaja uss per proteger la populaziun pli veglia. Lezza è spezialmain periclitada. A partir d'ina vegliadetgna da 65 onns creschia la rata da mortalitad pervi dal coronavirus numnadamain a moda rasanta, quai mussian las cifras or da la China.
RTR novitads 09:00
