Il Cussegl federal ha adattà pliras ordinaziuns per cuntanscher la finamira da spargnar 15% dal gas tranter l'october da quest'onn e il mars dal 2023. Tranter auter duain implants che funcziunan il mument cun ieli e gas arder exclusivamain ieli quest'enviern.
Uschia possian ins spargnar a moda sperta gas, scriva il Cussegl federal. L'enviern pudessi numnadamain dar ina stretga da gas. Perquai ch'i veg producì dapli CO2 cun brischar ieli, vegnian schluccadas temporarmain tschertas prescripziuns d'ambient. Concret èn quai l'ordinaziun per mantegnair l'aria pura e l'ordinaziun da CO2.
Il Cussegl federal recumonda a las interpresas e persunas privatas d'emplenir gia ussa lur tancs d'ieli.
Be 20 grads en edifizis federals
Er bajetgs federals duain spargnar quest'enviern. Il Cussegl federal limitescha la temperatura sin maximalmain 20 grads. El stima da spargnar uschia fin a 10% dal consum d'energia per il stgaudament. Ultra da quai vul il Cussegl federal reducir per in terz il quantum da gas che ils edifizis civils da la Confederaziun dovran. Quai cun differentas mesiras sco metter giu l'aua chauda u metter giu apparats betg necessaris.
