Per cumbatter la mancanza da persunal qualifitgà duai vegnir lavurà dapli tenor la Federaziun dals patruns. En Svizra tschertgan per il mument adina dapli firmas novas forzas da lavur qualifitgadas. Tenor la Federaziun dals patruns manchian uschia fin il 2030 in mez milliun persunas.
Dapli uras ed ir en pensiun pli tard
Per far frunt a quest svilup pretenda la Federaziun dals patruns d'auzar il volumen da lavur – pia da lavurar dapli uras l'emna. Er la durada da la vita professiunala duai vegnir prolungada sur 65 onns.
Plinavant vul la federaziun stgaffir dapli plazzas da tgira per uffants, per che omadus geniturs possian lavurar cun pensums auts. Ina spina en ins egls da la federaziun da patruns è il trend da pensums bass tar persunas cun in studi da scol'auta terminà. Academicras ed academichers duain perquai stuair amortisar ils custs da lur studi, sco la Federaziun dals patruns ha formulà vinavant en ses pachet da mesiras.
