Siglir tar il cuntegn

Header

video
Masserey: «Il dumber da cas sto sa reducir»
Or da News-Clip dals 12.11.2020.
laschar ir
cuntegn

Svizra Masserey: «Stabilisaziun sin aut nivel»

Virginie Masserey, la manadra da la secziun per controlla d'infecziun da l'Uffizi federal da sanadad BAG, ha declerà ch'il dumber d'ospitalisaziuns e da novs cas è anc adina aut, la tendenza sa stabilisescha dentant. I dettia per il mument er fitg blers cas che na vegnian gnanc chattads, ha ditg Masserey, damai che la rata da positivitad da tests, saja anc adina aut.

Tar ils letgs intensivs en ils ospitals, dettia uss puspè dapli capacitads, damai che pazients vegnian spustads ed er operaziuns betg necessarias vegnian stritgadas. I na saja dentant betg l'intent da trasora auzar la capacitad. Ins speria che la tendenza dal mument saa in bun segn, che la glieud sa cuntegnia puspè auter.

Finamira concreta: Far permez il dumber da cas

La taskforce propona da metter ina finamira concreta. Mintga duas emnas duai il dumber da cas concrets vegnir fatga permez. Ils 10 da december stues ins esser tar sut 2'000 cas. «Sco in Tour de Suisse, nua ch'i sto vegnir cuntanschì mintga duas emnas ina finamira d'ettappa.» Quai dettia ina perspectiva, ha declerà Martin Ackermann, il president da la taskforce da Covid-19.

video
Ackermann: «Stuain cuntanscher ina mira mintga duas emnas»
Or da News-Clip dals 12.11.2020.
laschar ir

Tge ch'i dovira per quai? La cifra da reproducziun sto sa sbassar sin sut 0,8, anc meglier sut 0,7. Questa valur da R saja schon datiers, cun actualmain 0,8, ella saja dentant anc betg exacta. Las mesiras da protecziun stoppian exnum vegnir realisadas. Ulteriuras mesiras stoppia restar in'opziun.

6'924 novs cas da corona

Il BAG ha annunzià gievgia 6'924 novs cas entaifer 24 uras. Uschia giascha la media da l'emna tar 6'666 cas. Quai è 17% pli pauc che l'emna avant La rata da positivitad è actualmain tar 26,6%. Ultra da quai ha il BAG annunzià 94 novs mortoris. Cun radund 27 da 100 tests positivs è la valur minimala da 5% cleramain surpassada. Tenor la WHO, crescha uschia il risico ch'il dumber da cas annunzias na correspunda betg a la realitad, co il virus sa derasa. Sch'ils cas s'augmentan, i na vegn dentant betg testà dapli, èsi probabel ch'il dumber stgir è pli aut.

En Grischun èn actualmain 64 persunas ospitalisadas pervi dal coronavirus. Quai èn tantas persunas sco anc mai. Il mument dettian ils ospitals dentant dumogn a la situaziun.

RTR novitads 15:00

Artitgels legids il pli savens

Scrollar a sanestra Scrollar a dretga