Siglir tar il cuntegn

Header

video
Tantas persunas sco anc mai èn pervi da corona en l'ospital
Or da Telesguard dals 12.11.2020.
laschar ir
cuntegn

64 pazients ospitalisads Tants sco anc mai en ospital – scolas restan avertas

Actualmain èn 64 pazients en l'ospital pervia d'ina infecziun cun il coronavirus. En cifras absolutas èn quai uschè bleras persunas ospitalisadas sco anc mai. Quella cifra è sumeglianta sco la fin da mars da quest onn.

Ils ospitals na sajan anc betg surchargiads. Quai ha ditg Reto Keller, il directur dal ospital da Tusaun e president da la conferenza d'ospitals dal Grischun. Las persunas ospitalisadas sajan scumpartidas en ospitals en tut il chantun.

Reto Keller è cuntent, ch'il dumber da novas infecziuns para da sa stabilisar. Per il mument sajan quai var 100 cas novs mintga di. Tuttina resta la situaziun tendida.

Stretgas da persunal datti pervia dal dumber aut da pazients che dovran ina tgira intensiva.
Autur: Reto Kellerpresident da la conferenza d'ospitals grischuns

Per il mument n'haja il Grischun anc betg dumandà ils auters chantuns da surprender pazients. Quai na saja anc betg stà necessari. Er viceversa n'hai anc betg dà dumondas.

Tests svelts sa cumprovan

Ils tests sperts che mussian in resultat suenter 15 minutas sajan sa cumprovads haja la media chantunala Marina Jamnicki ditg oz envers las medias. Adina puspè en ils tests svelts stads en la critica perquai che la vardaivladad saja stada pli bassa che tar ils tests da PCR che cuzzan 1-2 dis enfin ch'ins ha in resultat. Dapi l'entschatta november vegnian quests tests svelts duvrads da medis. Ussa stattan quels era als ospitals grischuns ed als centers da tests a disposizun. Medemamain hajan era las apotecas signalisà da porscher ils tests svelts sin la fin dal mais.

Serrar scolas n'è betg ina opziun

Avant in pèr dis haja dà plirs cas da corona en las scolas a Zorten e Val Müstair nua ch'entiras classas han stuì ir en quarantina. La media chantunala Marina Jamnicki ha oz ditg che serrar scolas sco il mars, na vegn actualmain betg en dumonda. Percunter veglian els intercurir mintga singul cas e chattar ora co l'infecziun è sa derasada e lura decider individualmain co franar la chadaina d'infecziuns.

Situaziun naziunala

L'Uffizi federal da sanadad BAG annunzia oz 6'924 infecziuns novas cun il coronavirus entaifer in di per la Svizra ed il Principadi da Liechtenstein. Il tagl dals davos 7 dis è tar 6'666. En pli a il BAG registrà 94 ulteriurs mortoris e 280 ospitalisaziuns.

RTR novitads 12:00

Artitgels legids il pli savens

Scrollar a sanestra Scrollar a dretga