Siglir tar il cuntegn

Header

video
Berset: «Nus essan baud avunda vidlonder per agir»
Or da News-Clip dals 22.10.2020.
laschar ir
cuntegn

Mesiras da corona pli severas Engelberger: «In slowdown empè dad in lockdown»

Cusseglier federal Alain Berset e represchentants da la Conferenza svizra da las directuras e dals directurs chantunals da sanadad èn s'inscuntrads oz per discutar l'ulteriur agir en chaussa corona.

  • Fin mesemna che vegn sa mussa, sche las mesiras da fin uss tanschan.
  • Novas mesiras pudessan pertutgar il temp liber ed in schlargiar da l'obligatori da purtar mascrinas.
  • La finamira è vinavant dad evitar in lockdown.
  • Tests svelts duain bainbaud vegnir lubids en Svizra.
  • La dumonda dad indemnisaziuns finanzialas vegn pir discutada.

Il cusseglier federal, Alain Berset, ha infurmà davart la sesida cun ils directurs chantunals da sanadad. Ins haja fatg in'analisa da la situaziun – la situaziun saja seriusa. Tut ils acturs sajan uss dumandads da ponderar, co reagir en questa situaziun. Ins haja gia prendì diversas mesiras, fin che quellas hajan effect, giaja dentant in pèr dis.

Finamira saja anc adina dad evitar ina surchargiada dal sistem da sanadad – quai dentant senza ir en in lockdown total. La Confederaziun ha uss dà en consultaziun als chantuns ulteriuras mesiras. Uschia possian ins sur la fin d'emna evaluar, tge ulteriuras mesiras ch'i drova e prender proxima mesemna ina decisiun, ha ditg il minister da l'intern.

Tscherts ospitals vegnan gia als cunfins

Er Lukas Engelberger, il president da la Conferenza svizra da las directuras e dals directurs chantunals da sanadad GDK, ha accentuà che la situaziun saja fitg seriusa. Las cifras d'infecziun creschian exponenzialmain ed uschia dettia er adina dapli ospitalisaziuns. En tscherts lieus vegnian ins gia als cunfins da la capacitad. Spezialmain ferm saja il Vallais pertutgà. Il proxims dis dovria quai ulteriuras decisiuns dals chantuns.

La GDK cusseglia als chantuns las suandantas mesiras:

  • Ulteriuras restricziuns tar reuniuns da persunas en il spazi public
  • schlargiar l'obligatori da purtar mascrinas
  • restrenscher activitads dal temp liber e da sport, er da clubs
  • ulteriuras restricziuns en restaurants sco per exempel la grondezza da maisas

Contact tracing betg concepì per questas dimensiuns

Il contact tracing saja vinavant impurtant per ils chantuns, uschia Lukas Engelberger. I vegnia dentant a dar largias e retards. Per il dumber da cas actuals na saja il contact tracing betg concepì.

5'256 cas novs

Per la Svizra ed il Principadi da Liechtenstein ha l'Uffizi federal da sanadad BAG la gievgia annunzià 5'256 novas infecziun – 28 da quellas en il Grischun.

La media svizra da 7 dis è actualmain tar stgars 3'500 novas infecziuns per di. Tenor il BAG hai dà 11 ulteriurs mortoris pervi dal virus. 106 persunas han stuì ir en l'ospital.

En il Grischun sa chattan 9 persunas en l'ospital pervi da Covid-19. Da quellas sa chatta ina persuna sin la staziun intensiva e sto vegnir respirada. 282 persunas èn en isolaziun e 653 en quarantina.

Ultra da quai possia er esser ch'ils ospitals stoppian il proxim temp stuschar operaziuns betg urgentamain necessarias, per pudair tractar pazients da corona, ha ditg Engelberger.

Slow-down empè da lockdown

Tenor Engelberger na veglian ins nagin lockdown ed er nagin mini-lockdown. Ins stoppia simplamain esser pront dad acceptar tschertas restricziuns durant il temp liber. Ins veglia per consequenza uschia plitost in slow-down.

video
Engelberger: «Nus vulain che la vita va vinavant»
Or da News-Clip dals 22.10.2020.
laschar ir

Tests svelts duain bainbaud vegnir lubids

Ils tests svelts hajan mussà buns resultats en las analisas scientificas, ha ditg Alain Berset. Ins veglia uss prender en funcziun quels uschè svelt sco pussaivel.

Cura ch'ils tests svelts vegnian dentant mess en funcziun, possian quels be vegnir duvrads en il rom da la strategia naziunala da testar, uschia Berset. Ins veglia metter a disposiziun ina capacitad gronda avunda per testar. Quai saja la finamira principala dals tests svelts.

Tgi paja per las perditas?

Sin la dumonda d'ina schurnalista, sch'i dettia ulteriur agid finanzial per restaurants, ha Berset respundì che quai saja vegnì discutà oz e restia punct da discussiun.

Il pli urgent saja uss dentant da prender mesiras. Tgi che finanzieschia cura tge, na possia actualmain betg esser la dumonda, ha Berset ditg sin la dumonda tgi che paja per las mesiras. Sch'ins n'ageschia uss betg decisiv, lura sajan las consequenzas pli tard anc pli grondas.

video
Alain Berset davart tests svelts
Or da News-Clip dals 22.10.2020.
laschar ir

Infurmà la gievgia suentermezdi han:

  • Cusseglier federal Alain Berset, parsura dal Departament federal da l'intern
  • Cusseglier guvernativ Lukas Engelberger, president da la Conferenza svizra da las directuras e dals directurs chantunals da sanadad

RTR novitads 15:00

Artitgels legids il pli savens

Scrollar a sanestra Scrollar a dretga