En il chantun Genevra èsi scumandà da sa radunar en gruppas cun passa 15 persunas en il spazi public. Il scumond vala en spezial sin plazs, promenadas ed en parcs. Quai ha la regenza dal chantun Genevra annunzià la mesemna suentermezdi.
Occurrenzas privatas cun passa 100 persunas scumonda la regenza. Tar occurrenzas publicas ston ils visitaders adina purtar mascrina. Vitiers èsi mo pli lubì da consumar cun in plaz da seser.
En il decurs da la davos’emna ha il chantun Genevra dumbrà bunamain 1’000 persunas testadas positiv sin il coronavirus. Diesch persunas dovran tgira intensiva en ospitals.
Il chantun Turitg prenda en mira clubs e bars
Ed en il chantun Turitg èsi a partir da gievgia obligatori da purtar ina mascrina en bars, clubs ed ustarias – quai vala là nua ch’ins na sesa betg vid ina maisa. Era il persunal dal service sto purtar mascrina.
Ed er d’occurrenzas privatas cun passa 30 persunas ch’han lieu endadens dovri la mascrina. La regenza turitgaisa ha decidì las novas mesiras, per ch’il persunal dal contact tracing na vegnia betg als cunfins. Las davosas duas emnas è il dumber da las novas infecziuns aifer in di – creschì sin 100’000 abitants da 51 sin 140.
