Il Cussegl federal ha deliberà il messadi da l'armada per il 2021. Quel cuntegna tranter auter credits d'obligaziun da var 2,3 milliardas francs. Quai èn var 400 milliuns pli pauc ch'il 2020. Cun quels daners duai l'armada sa preparar sin scenaris da conflicts moderns. Tranter auter vul l'armada optimar tschintg puncts centrals:
- Schlargiar sistems da communicaziun e da direcziun,
- meglierar la mobilitad da l'armada,
- proteger meglier la schuldada,
- adattar la logistica,
- modernisar l'infrastructura da furmaziun.
Daventar pli ecologic
Plinavant duai l'armada vegnir pli ecologica. Fin il 2030 duai l'armada reducir las emissiuns da CO2 per almain 40%. La gronda part da las immobilas da la Confederaziun tutgan numnadamain tar l'armada. L'armada saja perquai essenziala per sbassar las emissiuns da la Confederaziun.
Per cuntanscher quella finamira vul l'armada sanar differents edifizis e montar cellas solaras sin ils tetgs. Plinavant duai l'armada cumprar vehichels pli effizients ed optimar il program da l'aviatica militara. Mo tar l'aviatica dettia il potenzial da spargnar 28 tonnas CO2 mintg'onn.