Il parlament vul uss midar la lescha. Suenter il Cussegl naziunal è er il Cussegl dals chantuns entrà en ina iniziativa parlamentara.
Uss ha la Cumissiun d'instituziuns politicas d'elavurar ina proposta. En il futur duain sulet dumondas che procuran per zunt gronda lavur custar. La cumissiun vuleva evitar la midada per che la pratica d'uss restia. Ella temeva ch'i dettia en l'avegnir bler dapli dumondas, spezialmain las dumondas cumplexas. Tenor Hans Stöckli (PS) dal chantun Berna na saja quai dentant betg il cas, sco l'exempel da ses chantun mussia, nua ch'ins haja gia fatg questa midada.
Public, sche buc secret
Mintgin ha il dretg da prender invista en documents uffizials, er senza inditgar in interess spezial. La basa da quai dretg è la lescha da transparenza che vala dapi il prim da fanadur 2006. Dapi lura vala la premissa che tut è public nun ch'i saja explicitamain declerà secret. Avant valeva il cuntrari, tut era secret, nun ch'i era explicitamain declerà public.