- Dretg penal per giuvenils
Sco il Cussegl federal ha communitgà, pon persunas che han commess in mazzament en la vegliadetgna tranter 16 e 18 onns da nov vegnir internadas rigurusamain cura ch’ellas èn creschidas.
Il Cussegl federal accentuescha vinavant che las sancziuns dal dretg penal per giuvenils valan enfin la cumplettaziun dal 18avel onn da vegliadetgna. In internament po pir ir en vigur suenter las sancziuns dal dretg penal per giuvenils.
- Cancer da la beglia e malsognas cronicas
La cassa da malsauns paja a partir dal fanadur ils tests per detectar cancer da la beglia per persunas tranter 50 e nov 75 onns. Fin qua era il cunfin tar 69 onns. Questa midada duai gidar a chattar pli baud malsognas seriusas.
Vinavant na ston persunas cun ina malsogna cronica betg mussar si lur basegn supplementar per che quel vegnia surpiglià da la cassa da malsauns. La schanza ch'i dettia maldiever saja fitg pitschna, uschia il Cussegl federal.
- Falsificaziuns en spediziuns pitschnas
Il Cussegl federal vul agir pli ferm cunter falsificaziuns da products. En l'avegnir duain falsificaziuns en spediziuns pitschnas pudair vegnir destruidas pli simpel.
Tenor il Cussegl federal è la procedura actuala per destruir la rauba cumplexa perquai che tant ils possessurs dals dretgs sco er ils empustaders ston vegnir infurmads. La nova procedura simplifitgada prevesa ch'en l'emprim pass vegn infurmà mo l'empustader. Sch'el dat il consentiment per la destrucziun, vegn la rauba destruida. Sch'el na dat betg il consentiment, po il possessur dals dretgs iniziar ulteriurs pass.
- Examen da manischar
Per tut quels e quellas che fan la patenta d'auto u da töf: attenziun! Ussa vegn era testà sch'ins ha sut controlla ils sistems d'assistenza da manar, sco per exempel il tempomat. Quai vala tant per l'examen da teoria sco era per l'examen pratic. La finamira è che las aspirantas ed ils aspirants sa sentan pli segirs en l'auto cun tut quests sistems moderns.
- Nova classificaziun per e-bikes ed e-scooters
E-bikes sperts che van fin 45 km/h ed e-scooters che van fin 20 km/h vegnan ussa classifitgads sco «mopeds». Ina nova categoria «e-mopeds grevs» è vegnida creada per vehichels sco «cargo-bikes» che pon pasar cun chargia fin 450 kilos. Impurtant: Tut quests vehichels classifitgads sco «mopeds» na dastgan betg pli ir sin las vias da velo, era betg sch'els han stizzà il motor. Quai duai procurar per dapli segirezza per las velocipedistas ed ils velocipedists.
- Etichetta d'energia per telefonins e tablets
Da nov ston era apparats electronics sco telefonins e tablets esser marcads cun in'etichetta d'energia, da cotschen sur oransch a verd. Questa etichetta inditgescha – sin ina scala dad A fin G – quant effizients che quests apparats èn. Questa midada duai gidar ils consuments e las consumentas da cumprar products pli effizients.
- Nova declaraziun per products d'animals
Products sco latg, ovs e charn che derivan d'animals ch’en vegnids tractads senza narcosa ston ussa vegnir declarads uschia. Quai po includer praticas sco tagliar giu las cornas a las vatgas u la chastraziun da pors e biestga.
Plinavant scumonda la Confederaziun l'import da pails d'animals ch’en vegnids torturads.