La midada da la politica monetara da la Banca naziunala svizra ha er in effect sin ils contos da spargn da las Svizras ed ils Svizzers. Uschia survegnan persunas creschidas tar bleras bancas localas puspè in tschains da basa da 0,5% u dapli. Quai demussa in studi ch’il servetsch da cumparegliaziun Moneyland ha publitgà.
In zic auter èsi tar las bancas grondas. La ZKB è la pli generusa da las tschintg bancas grondas svizras, cun 0,5%. Tar la Postfinance datti 0,4% tschains. L'UBS porscha 0,1% per contos da spargn ed er la CS e la Raiffeisen porschian vinavant in tschains che saja sut la media, scriva Moneyland.
Da giudair cun precauziun
Impurtant saja dentant da guardar bain sin las cundiziuns, avertescha Moneyland. Tar blers contos cun buns tschains valan limitaziuns e strentgas reglas da retratga. Uschia datti per exempel 0,6% tschains tar la banca chantunala da Schaffusa, ma quella quota vala be per maximalmain 20'000 francs.
