Cun quest pass vul la banca naziunala far frunt al squitsch d’inflaziun creschì ed ad in ulteriur augment da la chareschia, ha declerà la BNS la gievgia. Ultra da quai na saja betg d’excluder ch’i dovria ulteriurs augments dal tschains per garantir a media vista la stabilitad dals pretschs.
La BNS aveva gia mez settember terminà in'era da tschains negativs, quai suenter bunamain otg onns cun in augment da 0.75 puncts procentuals. Gia avant aveva la banca la stad puspè augmentà ils tschains per in mez punct procentual, e quai per l’emprima giada dapi 15 onns.
Dapi lura ha la chareschia laschà suenter in zic en Svizra. L’ultima giada il november è ella sa midada senza midadas tar il mais precedent cun 3%. Avant era ella s’augmentada temporarmain fin a 3,5%.
Er en zona da l'euro crescha il tschains
La Banca centrala europeica a Frankfurt ha augmentà il tschains directiv per 0,5 puncts procentuals sin 2,5%. Quai per far frunt a l’inflaziun fitg auta en la zona da l’euro. Per l’entir onn quintan ils survegliaders monetars cun ina chareschia da 8,4%. Er l’Institut d’emissiun dals Stadis Unids, la FED, ha la notg passada augmentà il tschains directiv per 0,5 puncts procentuals. Uschia è la marscha da tschains tranter 4,25 fin 4,5%.
