L'enviern da corona ha laschà enavos fastizs tar bleras pendicularas en il Grischun. Tut en tut mitschan quellas dentant cun in egl blau. Tenor il monitor da turissem che las Pendicularas grischunas han publitgà il mardi, han las pendicularas fin la fin da mars pudì transportar 22,5% damain giasts che l'onn avant e la svieuta è 21,3% pli bassa.
Stagiun cumparegliabla cun onns da crisa
Cumpareglià cun la media dals ultims 10 onns munta la reducziun tar ils giasts transportads a 14% e tar la svieuta a 10%. Tut en tut è la stagiun actuala da las pendicularas en il sectur da transport cumparegliabla cun ils onns da crisa, cura che la Banca naziunala svizra aveva schlià il curs minimal da l'Euro. Cun cumparegliar las cifras saja dentant er da resguardar ch'ils concepts da segirezza hajan influenzà marcantamain ils custs durant quest enviern, fan las pendicularas attent.
Ina greva partenza, in cumbat per insumma astgar avrir, lura ina buna fasa intermediara, suenter l'entira discussiun pervia da las terrassas e la finala da Pascas cuntentaivel.
Situaziun dramatica per gastronomia
Pli dramatic vesa la situaziun dentant or tar la gastronomia en ils territoris da skis. Qua quintan las pendicularas per l'entir enviern cun ina reducziun da la svieuta per 60%, cumpareglià cun l'onn avant. I saja dad ir or da quai che la gronda part da las pendicularas stoppia dumandar agid per cas da direzza en quella sparta.
Betg tut las pendicularas èn dentant vegnidas tuttina bain tras l'enviern. Patì pli ferm han quellas destinaziuns che vivan tradiziunalmain da blers giasts da l'exteriur. Cun territoris da skis che vegnan surtut visitads da giasts svizzers èsi en general ì meglier.
Arosa-Lai relativescha las bunas cifras
Tar las pendicularas dad Arosa-Lai èn per exempel be 7% damain skiunzs stads quest enviern sin pista. Quai tuna d'in bun resultat, sch'ins resguarda las restricziuns da corona. Il schef da las pendicularas Lai, Peter Engler, di dentant che las perditas en la gastronomia sajan enormas ed er ils custs per realisar ils concepts da segirezza na sajan betg da sutvalitar. Sche tut giaja bain muntia la perdita la finala be ad in pèr tschientmilli francs. Investiziuns planisadas per la stad che vegn, stoppian dentant vegnir spustadas per in onn.
Laax ha prolungà la stagiun
Sumegliant sco tar las pendicularas dad Arosa-Lai tuna quai er a Laax, nua ch'ins ha gist decidì da prolungar la stagiun – tut tenor aura fin la fin d'avrigl u l'entschatta da matg. Tar la vendita da bigliets guarda quai er qua ora bain, ma tar la gastronomia quintan ils responsabels cun ina gronda perdita. Quant gronda exact che quella vegnia ad esser, dependia lura da l'agid finanzial per cas da direzza che vegnia concedì dal chantun e la Confederaziun.
Pli dir per il territori dal Corvatsch
En il territori da skis engiadinais dal Corvatsch, ch'ha tradiziunalmain blers giasts da l'exteriur, han ins quest enviern dumbrà passà 30% damain skiunzs e skiunzas sin pista. Cifras concretas tar la vendita da bigliets na dettia dentant anc betg, fatg giu quint vegnia pir suenter Pasca. Ils responsabels han dentant anc speranza da pudair meglierar il resultat las proximas emnas. Planisà èsi numnadamain da laschar avert il territori da skis fin il matg.
Pendicularas svizras quintan cun 30% damain svieuta
Las pendicularas svizras quintan per questa stagiun tar la svieuta cun in minus da passa 30%, cumpareglià cun ils onns avant. Fin la fin da favrer saja il dumber da skiunzas e skiunzs sa reducì per 21% e la svieuta per 25%, ha ditg il directur da las Pendicularas svizras, Berno Stoffel sin dumonda da l'agentura da novtads Keystone-SDA.
La tendenza vegnia anc a s'intensivar fin suenter Pasca. L'enviern saja cun distanza la stagiun la pli impurtanta ed ina tala perdita na possian las pendicularas betg purtar. La branscha pretenda perquai schliaziuns da sustegn da la Confederaziun e dals chantuns.
