Siglir tar il cuntegn

Header

Skiunz vi d'in runal.
Legenda: L'obligatori da mascrinas duai valair er sin runals e sin sutgeras e betg be en cabinas serradas. Keystone
cuntegn

Pendicularas svizras Mesiras pli severas per skiunzs e skiunzas

Avant che la stagiun da skis cumenza per propi, han las pendicularas en Svizra surlavurà lur concept da protecziun. Quai scriva la SonntagsZeitung che sa referescha ad in document che l'Uniun Pendicularas Svizra ha tramess a ses commembers.

Tenor il nov concept vala l’obligatori da purtar mascra sin tut ils indrizs – pia er sin runals e sutgeras. En ina versiun pli veglia valeva l’obligatori mo en pendicularas. Da nov ston ils skiunzs er purtar ina mascra da star en colonna en il liber e betg mo pli en locals da spetgar serrads.

Er evitar fullas da glieud

Sco Benno Stoffel, directur da las Pendicularas svizras, ha declerà envers la Sonntagszeitung, cusseglia l'uniun a las pendicularas er da guardar per urden en ils spazis da spetga – quai per exempel cun signalisaziuns pli cleras, barrieras ubain cun persunal al lieu che guarda d'evitar fullas da glieud.

Cun las mesiras pli severas reageschan las Pendicularas svizras sin il dumber da novas infecziuns ch'è creschì a moda dramatica l'ultim temp sco era sin las mesiras pli severas ch'il Cussegl federal ha ordinà la mesemna passada.

Il concept da protecziun han l'Uniun da las pendicularas suttamess a l'Uffizi da sanadad. Betg perquai ch'els hajan stuì, mabain perquai ch'els veglian plausibilisar quel, uschia Stoffel. Betg be las pendicularas, mabain er ils chantuns duajan suandar quel.

RTR novitads 09:00

Artitgels legids il pli savens

Scrollar a sanestra Scrollar a dretga