Il Cussegl federal na ceda betg e vul cuntinuar ils discurs cun ils Stadis Unids – per contrahar megliers dazis ch'ils 39% che valan dapi gievgia bun'ura. Ina schliaziun dovra tenor il Cussegl federal dapli temp. Da cuntramesiras svizras vers ils Stadis Unids vul il Cussegl federal per il mument desister.
A la conferenza da medias ha il Cussegl federal però era annunzià mesiras per mitigar las consequenzas da quels dazis per las branschas che vulan exportar en ils Stadis Unids. Tranter auter è quai che lavur curta vegn concedida pli nuncumplitgà, las indemnisaziuns da lavur curta duain valair pli ditg ed il Cussegl federal vul distgargiar firmas da regulaziuns.
A partir da gievgia, ils 7 d'avust 2025 imponan ils Stadis Unids dazis da 39% sin imports da la Svizra. A la delegaziun dal Cussegl federal n’èsi para betg gartegià da far ina cunvegna cun il president american Donald Trump. Il suentermezdi ha il Cussegl federal ina sesida e vegn suenter ad infurmar davart las tractativas, scriva il Cussegl federal sin X.
Ils davos dis èn la presidenta da la Confederaziun Karin Keller-Sutter ed il minister d’economia Guy Parmelin stads a Washington per far in meglier deal e d’uschia impedir ils auts dazis. In inscunter cun Trump n’hai dentant betg dà. Keller-Sutter è s’inscuntrada cun il minister da l’exteriur Marco Rubio. Quest discurs saja stà positiv.
Ina tariffa da dazi pli auta che la Svizra han mo la Siria, la Brasilia, Laos e Myanmar. Per l’Uniun europeica valan dentant mo dazis da 15%. Il Cussegl federal vul infurmar en chaussa il suentermezdi.
Reacziuns
Las associaziuns economicas svizras reageschan cun pleds drastics sin l'introducziun dal dazi american da 39% sin products svizzers. Economiesuisse discurra d'in «ristg considerabel» per la Svizra. Swissmem numna ils dazis in «scenari d'orrur». Per ina soluziun dovria in agir coordinà da la politica e da l'economia. Ils novs dazis pericliteschian la cumpetitivitad internaziunala e dieschmillis da plazzas da lavur, hai num en ina communicaziun dad Economiesuisse. Il Cussegl federal duai manar vinavant las tractativas cun ils Stadis Unids cun la pli auta prioritad.
La PPS vul distgargiar interpresas: Il president da la Partida populara svizra, Marcel Dettling, cusseglia al Cussegl federal «urgentamain» da negoziar vinavant cun ils Stadis Unids. «A l'intern dal pajais duai el dentant lavurar suenter cunzunt per distgargiar las interpresas e co ch'ils custs d'energia pon finalmain vegnir reducids.» Questas temas entaifer il pajais possian vegnir promovidas independentamain da tractativas cun ils Stadis Unids, ha ditg Dettling.
Il Center ponderescha cuntramesiras: Il president dal Center Philipp Matthias Bregy discurra d'ina dira frida per l'economia svizra. «Nus stuain ussa cumparair a moda segira da sasez, agir en moda calma e ponderada. Per l'ina ston ins discurrer da cuntramesiras, per l'autra dentant era da stabilisar l'industria d'export, concret era tras lavur curta.» Sco cuntramesira propona Bregy dazis sin products americans – cunzunt per rauba che la Svizra producescha sezza u po importar da l'exteriur.
La PLD vul sfurzar il commerzi liber: Era reagì ha il schef da fracziun da la Pardida liberaldemocratica Damien Cottier. Tenor ses avis duai il Cussegl federal ussa fixar in commerzi liber cun auters stadis. «Igl è uss impurtant che nus fetschian mesiras en Svizra. Nus stuain contractar cun auters partenaris.» Il Cussegl federal stoppia instradar novas cunvegnas da commerzi anc pli proactiv, manegia il cusseglier naziunal da Neuchâtel. Plinavant stoppian las firmas en Svizra vegnir distgargiadas.
PS per sa drizzar pli ferma envers l'UE: Il co-president da la Partida socialdemocratica Cédric Wermuth discurra d'ina «umiliaziun publica dal Cussegl federal sco quai che nus avain darar vesì». La strategia da «far plaschentinas al reschim american» saja stada destinada da bell'entschatta da far naufragi. Pervia da quai pretenda la sanestra ch'i giaja ussa vinavant cun il pachet da contracts cun l'UE. «I dovra ussa dapli cooperaziun cun partenaris fidads en l'Europa», concluda Wermuth.
Era dapli dazis per l'India
Il president american Donald Trump ha dublegià ils dazis per rauba da l’India da 25% sin 50%. L’India importeschia vinavant ieli da la Russia – uschia la renfatscha. La nova tariffa da dazi duaja entrar en vigur en trais emnas. Cunquai avess l’India ensemen cun la Brasilia la pli auta tariffa da dazi american insumma. La regenza da l’India ha crititgà ferm l’annunzià da Washington. Quella na saja betg faira.