Siglir tar il cuntegn

Header

cuntegn

Nov co-presidi tar la PS Suenter Mathias Reynard desista era Priska Seiler Graf

L'emprim aveva il politicher vallesan annunzià da betg pli vulair candidar per la successiun da Christian Levrat sco president da la partida socialdemocratica. Silsuenter ha era sia co-candidata ditg ch'ella vegnia a dar si la cursa per il presidi.

Suenter ch'il politicher vallesan è sa retratg, ha sia co-candidata Priska Seiler Graf fatg il medem pass. Ella saja stada persvada da la co-candidatura, ha ella ditg envers radio SRF:

«I fiss stà ina ferma candidatura, dentant ella ha mo fatg senn en dus. Uss è la situaziun autra.» Da semplamain remplazzar Reynard na saja era nagina opziun: «Quai fiss sco d'entschaiver dal tut davant», ha ditg Seiler Graf.

Mathias Reynard e Priska Seiler Graf.
Legenda: La candidatura cuminaivla da Mathias Reynard e Priska Seiler Graf era vegnida enconuschenta il schaner passà. Keystone

Il glindesdi ha Mathias Reynard fatg a savair en in'intervista cun la gasetta «Le Nouvelliste», ch'el na veglia betg candidar per succeder a Christian Levrat. Ses cor saja ballantschà vi e nà tranter il post sco cusseglier guvernativ dal Vallais ed il presidi da la partida, ha el ditg. Uss saja el sa decis da candidar per il cussegl da stadi dal Vallais. Perquai desistia el da candidar per il presidi da la PS.

Mes cor e mes curaschi èn qua. Jau less dar enavos a mes chantun quai ch'els han permess a mai da far enfin ussa.
Autur: Mathias ReynardCusseglier naziunal PS/VS

Considerà ils avantatgs

Reynard ha er sincerà ch'i n'haja dà nagin squitsch da la partida u da la populaziun che haja muventà el a questa decisiun. I saja plitost stà l'impressiun ch'el possia esser pli nizzaivel a ses chantun che a la partida svizra. La candidatura da Reynard e Seiler Graf era vegnida enconuschenta il schaner passà.

Via libra per il duo Wermuth/Meyer

Ina candidatura cuminaivla per il presidi da la PS datti uss anc dal cusseglier naziunal Cédric Wermuth (Argovia) e da la cussegliera naziunala Mattea Mayer (Turitg). Vitiers candidescha il Bernais Martin Schwab ch'è strusch enconuschent sin livel naziunal.

En sasez aveva la partida vulì decider l'avrigl davart la successiun da Levrat – ma la crisa da corona ha fatg in stritg tras il quint. La partida ha spustà l'elecziun sin l'october. Plinavant datti dasper il duo da Reynard e Seiler Graf er anc auters candidats.

Ord l'archiv da SRF:

video
Cusseglier naziunal Mathias Reynard – in purtret
Or da Tagesschau dals 27.01.2020.
laschar ir

RTR novitads 10:00

Artitgels legids il pli savens

Ir a sanester Ir a dretg