- Il Cussegl federal na vul per il mument anc betg midar il provediment da basa da La Posta, puncto dimensiun e qualitad. Tuttina duai La Posta vegnir modernisada per adattar ella als basegns actuals.
- A partir dal 2030 duai il provediment da basa da La Posta lura s'adattar a la dumonda grazia ad in nov mecanissem.
- Era las mesiras da spargn che han procurà per citica vehementa restan part dal plan per l'avegnir tenor il Cussegl federal.
La Posta stat davant grondas sfidas, uschia ha il cusseglier federal Albert Rösti cumenzà la conferenza da medias a Berna. «La digitalisaziun ha procurà per grondas midadas en la fatschenta centrala.» Ils ultims 20 onns saja la quantitad da brevs sa reducids per bunamain la mesadad ed er ils pajaments che vegnan fatgs bar al spurtegl da La Posta sajan sa reducids massivamain.
Il Cussegl federal na vul betg spetgar cun la modernisaziun da La Posta fin che lezza sa chatta en ina situaziun finanzialmain precara.
Quests svilups hajan er in'influenza sin il provediment da basa che La Posta sto finanziar sezza, declera Albert Rösti. Ins stoppia perquai garantir che La Posta po er en l'avegnir anc dumagnar sia incumbensa. «Cun la modernisaziun dal provediment da basa na vul il Cussegl federal betg spetgar fin che La Posta sa chatta en ina situaziun ch'è finanzialmain precara», ha ditg il minister da La Posta.
Perquai haja la regenza a Berna decidì las valurs directivas per ina revisiun cumplessiva da la lescha da La Posta. Quellas duain ir en vigur a partir dal 2030. Il provediment da basa vegnia lura a cumpigliar la purschida dad oz cumprais las mesiras che vegnian il pli probabel anticipadas sin l'auter onn. A partir dal 2026 vul il Cussegl federal distgargiar la Posta mintg'onn per fin a 45 milliuns francs cun reducziuns vi dal provediment da basa.
Anc nagina reducziun da las purschidas
I na duai betg dar ina reducziun dal service puclic, uschè ditg che quel è anc dumandà, ha ditg Albert Rösti. «Guardà ord dal punct da vista actual duain ni la quantitad ni la qualitad dal provediment da basa vegnir reducids.» Concret: La Posta porta vinavant las brevs ed ils pachets a chasa durant 5 dis ad emna ed era la «A-Post» duai per il mument vinavant restar.
Gasettas abonnadas vegnan vinavant furnidas durant 6 dis ad emna, mintgamai fin las 12:30. La Posta duai vinavant porscher las medemas prestaziuns sin sava ubain al spurtegl, era a partir dal 2030. «Ultra da quai vegn ella vinavant a mantegnair ina rait dad uffizis ed agenturas postalas sin l'entir territori», ha ditg Rösti.
Reagir sin la mancanza da dumonda
Il Cussegl federal vul dentant integrar en la lescha da La Posta ch'il provediment da basa dastga vegnir adattà sche la dumonda prenda giu adina dapli. El veglia resguardar il basegns ch'i dat da lieu tar lieu.
«Il provediment da basa duai cuvrir ils basegns reals da las persunas ed interpresas», uschia Rösti. «Perquai sto La Posta pudair adattar a partir dal 2030 lur purschida flexibel a la dumonda – cunzunt, sche la dumonda vegn adina pli e pli pitschna.»
Sche nagin va pli tar La Posta na fa quai nagin senn da tegnair avert in uffizi postal simplamain per motivs da nostalgia.
Perquai duai vegnir integrà en la lescha da La Posta in mecanissem per adattar il provediment da basa tut tenor dumonda. En cas la glieud trametta er en l'avegnir adina pli paucas brevs, pudess La Posta pia far la dumonda da be pli distribuir brevs durant 4 dis enstagl da durant 5 dis ad emna.
«Uschia vulain garantir, che La Posta è adattada al temp ed ils custs dal provediment da basa restan supportabels.», ha declera Albert Rösti. «E sche nagin va pli tar La Posta na fa quai nagin senn da tegnair avert in uffizi postal simplamain per motivs da nostalgia.»
Per champs da lavur da La Posta ordaifer il provediment da basa vul il Cussegl federal crear ina segirezza legala. Fin il zercladur 2026 duai il departament per ambient, traffic, energia e communicaziun elavurar ina proposta da consultaziun.