Per Marcus Caduff, il president da la regenza grischuna, èsi cler che questas mesiras vegnan ad ir sin donn e cust da regiuns muntagnardas e periferas ed uschia fiss il Grischun spezialmain pertutgà.
La consequenza sche La Posta na sto betg pli servir abitadis cun pli pauc che tschintg chasas abitadas è tenor Marcus Caduff che quellas persunas stuessan lura avair insanua in chaum postal e tut tenor sa metter en l'auto per survegnir sia posta. Gist a quellas persunas na pudessian ins era betg dir da duvrar il traffic public perquai ch'i na dettia savens betg quel en talas regiuns. La Posta discurria qua da var 60'000 chasadas pertutgadas en l'entira Svizra. La dumonda da la regenza grischuna quantas chasadas che fissan pertutgadas en il Grischun n'haja l'interpresa betg respundì, di il president da la regenza. Quai è per el in segn cler ch'il Grischun fiss fermamain pertutgà. I saja in dischavantatg e quels lieus vegnian tractads auter ch'il rest – quai na saja betg gist.
Jau chapesch sche La Posta sto optimar. Lura duain ins dentant far quai uschia ch'i pertutga tuts tuttina, e betg ch'i va simplamain sin donn e cust da quels che vivan en regiuns pli periferas... Quai fa lura magari schon ch'ins pensa – quai na poi betg esser.
Era la mesira da reducir la punctualitad vesa el sco grond dischavantatg per il Grischun. Quai na vegnian ins tenor Marcus Caduff betg a far en las citads, regiuns urbanas ed aglomeraziuns – là saja tut pulit concentrà. Tant pli vegnia La Posta plitost a reducir la punctualitad en regiuns da muntogna ed uschia hajan ins puspè ina societad da duas classas. Schegea ch'il cusseglier guvernativ haja chapientscha per il fatg ch'era La Posta sto optimar ses process e servetschs, stoppia quai succeder uschia che tuts sajan pertutgads medemamain e betg simplamain sin donn e cust da regiuns che sajan forsa populadas in pau main che citads.
Cussegl federal è d'in auter avis
Cura ch'il Cussegl federal ha annunzià las mesiras da spargn avant in onn ha il cusseglier federal responsabel, Albert Rösti, snegà che las mesiras tutgian las regiuns muntagnardas e periferas. El ha numnadamain ditg che la gronda part dals respargns capitia en las citads ed aglomeraziuns perquai ch'i haja là anc marcantamain dapli filialas da posta.
In'eventuala reducziun dastgia però be succeder pass per pass e cun porscher alternativas da medema valur – quest avis partan tant il Cussegl federal e la regenza grischuna.