Anc mai han ins pudì duvrar en Svizra tants organs da persunas mortas sco l'onn passà. Ils organs da 200 baras han dastgà vegnir transplantads. Quai èn 22% dapli che l'onn avant.
Tenor la fundaziun naziunala per la donaziun d’organs Swisstransplant hajan 565 persunas survegnì almain in nov organ. Tuttina hajan anc adina bunamain 1’400 persunas spetgà sin in nov organ la fin dal 2023.
L'onn passà ha il suveran svizzer ditg cleramain Gea a la midada da princip: Il pli baud a partir dal 2026 dattan tuttas persunas organs, nun ch'ellas han cuntraditg a quai avant la mort.
Dapli donaziuns grazia a nova tecnica
In motiv per l'augment tar las donaziuns d'organs è tenor la fundaziun Swisstransplant ch'i dat dapi l'atun 2022 ina nova tecnica tar transplantaziuns dal cor, cun la quala ils ospitals han dapli temp tranter prender ora organs e transplantaziuns. Plinavant vegnian ospitals sustegnids da nov per identifitgar donaturas e donaturs potenzials.
