Siglir tar il cuntegn

Header

video
Alain Berset e las novas reglas per returnar en Svizra
Or da News-Clip dals 17.09.2021.
laschar ir
cuntegn

Novas reglas coronavirus Il Cussegl federal prenda mesiras en vista a las vacanzas d'atun

Il Cussegl federal ha decidì co tractar persunas che returnan da las vacanzas en l'ester. Las reglas valan davent da glindesdi. Plinavant ha il Cussegl federal reglà co persunas pon survegnir in certificat da Covid-19, sch'ellas han survegnì la vaccinaziun en l'exteriur u sch'ellas han gì là corona.

  • Novas reglas valan davent da glindesdi per persunas betg vaccinadas u guaridas, sch'ellas returnan en Svizra.
  • Sch'il temp dals tests gratuits è propi a fin u betg – il Cussegl federal vul anc ina giada ir sur ils cudeschs.
audio
In test negativ per turnar en Svizra – quai decida il Cussegl federal
03:13 min, Actualitad dals 17.09.2021.
laschar ir. Durada: 03:13 minutas.

Il Cussegl federal reagescha sin las experientschas fatgas suenter las vacanzas da stad, ed ha decidì novas reglas per glieud che returna da l'exteriur davent da glindesdi ils 20 da settember. El vul uschia impedir che las cifras d'infecziun creschan pervi da viagiaturs e viagiaturas che turnan en Svizra.

Davent da glindesdi ston persunas betg vaccinadas e che n'han betg gì corona, preschentar in test negativ. E suenter quatter fin set dis ston questas persunas sa laschar testar in'ulteriura giada. Quai ha il Cussegl federal decidì ils 17 da settember. Las novas reglas resguardian, che las varianta Delta dal coronavirus possia laschar crescher fitg las cifras en singulas regiuns. Perquai na saja ina glista da pajais da ristg, actualisada regularmain – betg pli la dretga mesira.

Formular per entrar daventa obligatoric

Nov ston dentant tut las persunas che returnan en Svizra emplenir ora in formular electronic che gida da localisar passagiers. Quai vala per tuts – pia per persunas vaccinadas, guaridas u testadas. Uschia possian ils chantuns far provas da controlla – sche persunas che ston far in segund test, fan lura propi era in tal. Excepziuns valan per cunfinaris, per persunas che nizzegian la Svizra sulet sco lieu da transit, per glieud che transporta professiunalmain rauba u persunas, e per uffants e giuvenils sut 16 onns.

video
Alain Berset davart las excepziuns tar ils tests per entrar
Or da News-Clip dals 17.09.2021.
laschar ir

Controllas e sancziuns

Tar il traffic sur cunfin vul il Cussegl federal controllas che sa basan sin il livel da ristg. Persunas senza in test ston far quel immediat. Ed er ils chantuns han lur pensums. Quels duain far provas da controlla sche las persunas betg vaccinadas u betg guaridas han propi fatg il segund test obligatoric.

Tgi che vegn traplà senza in mussament da test sto pajar ina multa da 200 francs. E tals che negligeschan d'emplenir ora il formular per localisar passagiers, ristgan ina multa da 100 francs.

La dumonda dals tests gratuits

La strategia actuala dal Cussegl federal saja, che la glieud stoppia pajar per ils tests da corona davent dal 1. d'october. Els sajan da l'avis che la maioritad da la societad haja fatg in grond sforz. Ils tests na sajan nagina sortida da la pandemia, tut auter la vaccinaziun. Il Cussegl federal veglia dentant anc ina giada discutar questa tematica. Per ina gruppa da persunas saja numnadamain difficil da pajar ils tests.

Las infecziuns èn sa reducidas in pau, dentant ellas èn anc adina sin in livel memia aut.
Autur: Alain Berset minister da sanadad

La situaziun actuala en Svizra

Là nua ch'i dettia regularmain tests da corona, sa quieteschia la situaziun, ha ditg cusseglier federal Alain Berset. Quai saja cunzunt il cas en las scolas. Las staziuns intensivas sajan il mument occupadas per 79% – cun 31% pazients e pazientas da Covid.

RTR novitads 15:00

Artitgels legids il pli savens

Scrollar a sanestra Scrollar a dretga