Siglir tar il cuntegn
cuntegn

Svizra #nowef – demo anti-WEF a Berna

A Berna (ca. 500 persunas), Genevra (ca. 100 persunas) ed a Losanna (ca. 40 persunas) è vegnì demonstrà la sonda cunter il forum mundial d'economia WEF, scriva l'agentura da novitads SDA. Las protestas sajan restadas – cun excepziun dad in u l'auter incap – paschaivlas.

Demonstrants ardan ina chasa da cartas durant la demonstraziun.
Legenda: Demonstrants ardan ina chasa da cartas durant la demonstraziun cunter il WEF. Keystone

Senza permis, dentant paschaivlamain: La sonda suentermezdi han tut en tut radund 640 persunas demonstrà a Berna, Genevra e Losanna cunter il WEF. La pli gronda demonstraziun è stada a Berna. Ella n'era betg vegnida lubida.

La polizia ha dentant laschà demonstrar cun avertir da far quai paschaivlamain. Quai ha para funcziuna. Tant la SDA sco er il SRF scrivan dad ina demonstraziun paschaivla ed er la Polizia chantunala da Berna ha scrit vers saira be da singuls incaps:

La polizia da Berna tar las ultimas novas da la demonstraziun:

A Berna han appellà tschertgels da la sanestra autonoma a la manifestaziun cunter ils regents a Tavau, che s'interessian sulettamain per lur chapital. En la rait scriva ina da las gruppas che ha clamà a la demo, la gruppa da giuventetgna revoluziunaria Berna, da 1'100 persunas che sajan sa participadas al protest.

Las duas pitschnas manifestaziun en la Romandie eran vegnidas instradadas da partidas sanestras, sindicats e differentas organisaziuns che na vulan naginas visitas da schefs da stadi da l'extrema dretga. En la critica era tranter auter il president brasilian Jair Bolsonaro che ha annunzià da vegnir al WEF.

L'emna proxima vegnan sanesters ed adversaris da la globalisaziun a far a Tavau ina manifestaziun lubida cunter il forum mundial d'economia WEF. Quel cumenza l'emna proxima.

RR novitads 18:00+