Il chantun Grischun sustegna da principi la proposta dal Cussegl federal da dar bons a persunas che persvadan autras da sa laschar vaccinar, uschia hai num en ina communicaziun. Ins duaja dar ina schanza a l'idea, era sch'auters pajais n'hajan betg gì success cun sumegliantas mesiras. Il Grischun ed il chantun Basilea-Citad èn entant però ils unics ch'èn s'exprimids positiv davart la bunificaziun en la consultaziun.
«Vaccinar sto esser in act solidaric»
Intgins chantuns da la Svizra orientala eran gia ordavant sa mussads critics envers l'idea cun ils bons. Ussa tuna quai er en ulteriurs chantuns sumegliant; tranter auter Sviz, Lucerna, Sutsilvania, Argovia e Glaruna. Ina decisiun per sa laschar vaccinar stoppia crudar per motivs da sanadad u da solidaritad e betg cun squitsch u motivaziuns monetaras, è tranter auter vegnì argumentà. Sustegn survegn perencunter la proposta per ina emna da vaccinaziun. Qua èn plirs chantuns s'exprimids positiv.
Cun il di dad oz va la consultaziun per las propostas dal Cussegl federal a fin. Quel decida lura definitiv ils 13 october davart l’offensiva da vaccinar.
