Trais da quatter ospitals acuts svizzers vegnian a scriver ils proxims tschintg enfin 10 onns cifras cotschnas, pervi da la pandemia da corona. Quai mussa ina retschertga da la firma da cussegliaziun d'interpresas PwC tar 45 ospitals e 12 psichiatrias.
Ils ospitals svizzers ston quintar pervi da la pandemia da corona cun custs tranter 1,7 e 2,6 milliardas francs. Quai di PwC sin basa dals resultats dal 2019, e cun discurrer cun ils schefs da finanzas dals ospitals analisads davart las consequenzas da la pandemia tar lur instituziuns.
Damain svieutas
Ed ils schefs da finanzas fan quint cun svieutas cleramain pli bassas, pervi da tut las lavurs e cumpras en connex cun il coronavirus. Perquai èn ils experts da PwC da l’avis, che la midada da structura tar ils ospitals svizzers vegnia pli spert che quintà fin uss. Quai muntia per exempel che prestaziuns staziunaras vegnian concentradas en pli paucs lieus – e ch'i vegnia a dar dapli staziuns ambulantas enstagl staziunaras.
Nova rolla dals ospitals
Tenor ils experts sa defineschan ils ospitals adina pli pauc sur lur dumber da letgs, mabain sur lur rolla sco interpresa da servetsch da sanadad. Ed er la digitalisaziun e la medischina sur il televisur vegnian a daventar adina pli impurtantas.
Il studi davart ils ospitals svizzers ha PwC preschentà per la novavla giada.
