Siglir tar il cuntegn

Header

cuntegn

Pandemia da corona BAG na recumonda nagin segund booster

Per la 100avla giada han expertas ed experts da la Confederaziun preschentà il stan actual da la pandemia davant las medias. Tenor Patrick Mathys da l'Uffizi federal da sanadad na saja quai nagin motiv da far festa. Quai mussia plitost ch'il virus sa derasia anc adina. Per la Taskforce naziunala da corona èsi dentant stà l'ultim Point de Presse.

Cifras d'ospitalisaziun creschan

Dapi la fin da favrer creschia il dumber d'infecziuns novas tendenzialmain puspè. Tenor Patrick Mathys stoppian ins quintar che var 10% da la populaziun pudessan esser purtaders dal virus ed uschia er infeczius. En las proximas duas fin trais emnas stoppian ins quintar ch'il dumber da cas novs creschia vinavant. Suenter possian ins quintar cun in regress.

video
Patrick Mathys: «Responsabla per las infecziuns è surtut la varianta BA.2»
Or da News-Clip dals 22.03.2022.
laschar ir. Durada: 1 minuta 5 Secundas.

Er tar las ospitalisaziuns hai dà in augment. Quel n'è dentant betg uschè ferm sco l'augment da las cifras d’infecziuns. Cun l'auta immunitad possian ins dentant acceptar autas cifras d'infeziuns, senza ch'il sistem da sanadad saja surchargià. Las staziuns intensivas svizras èn occupadas cun 156 persunas infectadas cun corona – in plus da 9%.

Survista dals chantuns

Malgrà che l'entschatta d'avrigl pudessan crudar davent tut las mesiras da corona: Las expertas ed ils experts recumondan vinavant da sa tegnair vi da las mesiras d'igiena, da lavar ils mauns, dar aria e da purtar ina mascrina. Uschia possian ins er proteger persunas cun in ristg pli aut. Sche per exempel l'obligatori da mascrinas en il traffic public croda la fin da mars, stoppian ins quintar cun in augment temporar dals cas novs.

Nagin segund «booster» recumandà

Tenor Christoph Berger, president da la Cumissiun federala per dumondas da vaccinar (Ekif), mussian ils vaccins da mRNA vinavant ina buna protecziun cunter in andament grev da la malsogna. La protecziun suenter duas vaccinaziuns ed in vaccin da rinfrestgament tegnia. Quai na valia dentant betg per in andament miaivel da la malsogna u d'ina infecziun. La recumandaziun da sa laschar vaccinar valia vinavant.

Ina segunda dosa da rinfrestgament na recumondan l'uffizi e la Ekif betg. Ina tala vaccinaziun augmentia puspè il nivel d'anticorpuls, portia dentant mo in pitschen effect cunter in'infecziun. Mo en cas singuls fetschia ina segunda vaccinaziun da rinfrestgament segn.

video
Christoph Berger: «Protecziun maximala tar trais vaccins da mRNA»
Or da News-Clip dals 22.03.2022.
laschar ir. Durada: 1 minuta 4 Secundas.

Tegnair en egl la situaziun

I saja difficil da far scenaris per il futur. Cun in augment marcant saja tenor experientscha da quintar l'atun. Blers facturs gioghian lura ina rolla, uschia Patrick Mathys. Uss giaja surtut per tegnair en egl la situaziun. Perquai cuntinuescha il BAG cun las acziuns enconuschentas:

  • Sistem obligatoric d'annunziar
  • Monitoring da l'aua persa
  • Provas punctualas tar la populaziun giuvna/mobila e la populaziun veglia
  • Rimnar las cifras d'infecziuns ed il dumber da persunas guaridas
  • Studis d'anticorpuls

L'Uffizi federal da sanadad ha plinavant annunzià da publitgar las cifras da cas mo pli ina giada l'emna. Mintga mardi vegnian ins a communitgar las cifras actualas.

video
Patrick Mathys: «Blers facturs giogan ina rolla»
Or da News-Clip dals 22.03.2022.
laschar ir. Durada: 51 Secundas.

Mancanza da persunal

En scolas ed ospitals da la Svizra manca adina dapli persunal pervi da corona. Tenor l'Associaziun svizra da manadras e manaders da scola croda ora en tschertas scolas fin ad in quart dal persunal. Er plirs ospitals svizzers annunzian stretgas tar il persunal – uschia l'Ospital universitar da Turitg u l'Inselspital a Berna. Singuls ospitals ston spustar operaziuns, perquai ch'il persunal manca.

RTR novitads 16:00

Artitgels legids il pli savens

Scrollar a sanestra Scrollar a dretga