La raschun per l'augment saja stada la pandemia da corona. Cunquai ch’ils restaurants sajan stads serrads, hajan blers cuschinà a chasa. Plinavant sajan ils cunfins stads serrads, uschia ch'i n’haja dà nagin turissem da cumpra, scriva Swissmilk.
Augment da la vendita
En total è il diever da latg creschì per 2% per persuna sin 366 kilograms ad onn. La vendita da paintg è creschida per 15,2%, la vendita da chaschiel per 13,9% e da la groma per 13,2%. E la vendita da latg frestg è creschida per 8,6%.
Er l'onn 2021 mussa gia in plus
Sulet durant l'emprim lockdown il mars 2020 èn las cifras da vendita da latg creschidas per 24%, cumpareglià cun il mars da l'onn avant.
Er las cifras dal 2021 ch'èn fin uss enconuschentas èn fermamain sur quellas dal 2019, dentant tuttina in zichel pli bass che quellas dal 2020. Schebain las cifras restan u sa reguleschan puspè sin il stan dal 2019, quai vegn a sa mussar en il decurs dals proxims mais.
