Selenski sa drizza al parlament
Il president da l'Ucraina ha discurrì via video a Berna. En il pled ha Wolodimir Selenski appellà a la solidaritad e da tegnair ensemen. El ha er discurrì davart la situaziun en l'Ucraina, nua ch'i moran mintga di persunas pervia da la guerra che la Russia ha cumenzà cunter l'Ucraina.
PUK po cumenzar lavurs en il cas Credit Suisse
Il parlament a Berna vul ina cumissiun d'inquisiziun parlamentara (PUK) che prenda sut la marella ils schabetgs cura che la banca UBS ha surpiglià a moda urgenta la Credit Suisse.
La cussegliera dals chantuns Isabelle Chassot presidiescha la cumissiun parlamentara d'inquisiziun areguard il salvament d'urgenza da la Credit Suisse. Ils biros da las duas chombras federalas han elegì la politicra friburgaisa da l'Allianza dal center en quest post.
Agid per Brinzauls
La cussegliera naziunala Anna Giacometti (PLD/GR) vul ch’il Cussegl federal s’engaschia per in'indemnisaziun da terren pers. Ella ha inoltrà ina moziun correspundenta. Ils bajetgs, quels sajan segirads obligatoricamain tar l’Assicuranza d’edifizis dal Grischun. Ed era las mobiglias ed il possess en ed enturn chasa possia tgi che veglia segirar. Tar il terren na saja quai dentant betg uschia.
Revisiun da la planisaziun dal territori
Il punct central da la revisiun da la lescha è ina finamira per stabilisar il dumber d’edifizis. Ils chantuns ston fixar en il plan directiv, co ch'els vulan cuntanscher questa finamira. Els ston dar regularmain in rapport a la Confederaziun e far, sche necessari, adattaziuns. Excepziuns per bajegiar ordaifer las zonas da bajegiar pon da nov ils chantuns reglar. Questa cumpetenza dals chantuns pussibiliteschia soluziuns fatgas sin mesira.
Midada cumpletta tar taglias sin proprietad d'abitar
Tgi che posseda ina chasa ubain in’abitaziun na duai en avegnir betg pli stuair inditgar la valur da l'atgna locaziun sch'el emplenescha la decleraziun da taglia. Il medem duai era valair per abitaziuns secundaras che na vegnan betg dadas a fit. Quai vul il Cussegl naziunal. El ha approvà – cuntrari al Cussegl dals chantuns – ina midada cumpletta da sistem tar las taglias sin la proprietad d'abitar.
Chlus duai profitar da cundiziuns favuraivlas
Il Cussegl naziunal ha il davos refusà da tractar l'ovra idraulica Chlus a moda prioritara. En ina nova proposta duai Chlus tuttina profitar da levgiaments e subvenziuns, dentant senza esser sin la glista. Il Cussegl dals chantuns ha approvà quai, uss va la fatschenta enavos en il Cussegl naziunal. Fin 200 milliuns francs sustegn pudessi dar per la Repower che vul bajegiar l'ovra Chlus.
Moziun cunter centralisaziun
Il dumber d’ospitals che dastgan porscher tractaments spezialisads per uffants e giuvenils duai vegnir reducì. Il cusseglier dals chantuns Martin Schmid (PLD) sa dosta cun ina moziun cunter questa restricziun.
Questa rinfatscha na lascha Michael Jordi, il secretari general da la conferenza da directurs da sanadad GDK, betg valair. Las decisiuns pertutgian mo 1-2% da tuttas prestaziuns dals ospitals, na mettian pia betg en dumonda l'existenza da singuls ospitals. La moziun è vegnida tramessa per elavurar a la cumissiun correspundenta.
