Ils verd-liberals svizzers han gia decidì l'entschatta d'avrigl a chaschun da la radunanza da delegadas e delegads, las parolas per las proximas votaziuns dals 15 da matg 2022
La Partida verd-liberala svizra recumonda da dir:
- Gea a la lescha per la donaziun d’organs (decidì cun 157 cunter 7 vuschs, 2 abstinenziuns)
- Gea a la participaziun svizra a la Frontex (decidì cun 161 cunter 3 vuschs, 2 abstinenziuns)
- Gea a la lescha da films («Lex Netflix») (decidì cun 111 cunter 55 vuschs, 8 abstinenziuns)
Puncto lescha da films sa mettan mettan ils delegads e las delegadas uschia cunter la posiziun da lur partida giuvna. Quella aveva decidì in Na a l'uschenumnada «Lex Netflix». Las votaziuns han lieu ils 15 da matg.
Vitiers an ils verd-liberals communitgà che la partida saja uss preschenta en tut ils 26 chantuns. En il chantun Uri an ins fundà la davosa secziun chantunala.
Dapli collavuraziun cun l'Europa
En ses pled d'avertura da la radunanza da delegadas e delegads dals verd-liberals svizzers, ha il president da partida, Jürg Grossen, pretendì dapli collavuraziun en vista a la guerra en l'Ucraina. Il maletg d'ina armada che defendia suletta il pajais na correspundia daditg betg pli a la realitad – l'idea da «Reduit» saja in relict dal davos millenni. Quai ha Grossen ditg en ses pled d'avertura da la radunanza da delegadas e delegads dals verd-liberals a Bienna. Concret a Jürg Grossen pretendì dapli cooperaziun cun l'Europa tar la cyber-segirezza e tar las cumpras da l'armada.
Il conflict cun l'Ucraina mussia, quant dependenta che la Svizra è da furniziuns dad auters pajais. En quel connex ha Jürg Grossen er tematisà ina cunvegna davart electricitad cun l'Uniun europeica. Plinavant dovria dapli mesiras cunter il sguaz da l'electricitad.