Il cusseglier naziunal turitgais Beat Walti chala la fin mars sco schef da fracziun dals liberaldemocrats. La decisiun da surdar la direcziun da la fracziun saja gia dapi in temp madira, vegn el cità en ina communicaziun. Suenter passa ina legislatura e stgars dus onns avant las elecziuns saja uss vegnì il dretg mument. El veglia puspè sa concentrar dapli sin la lavur da cussegl e cumissiun.
Beat Walti vegn il mars ad esser stà quatter onns e mez schef da la fracziun da la PLD. Il 2017 era el succedì al Cusseglier federal dad oz Ignazio Cassis. Experientscha sco schef da fracziun aveva el gì gia avant: Davent dal 2005 fin il 2008 aveva el manà la fracziun da la PLD en il Cussegl dal chantun da Turitg.
Nagina ruptura cun la direcziun da partida
Suenter che Petra Gössi era partida da la testa da la partida, ston ils liberaldemocrats ussa occupar ina segunda posiziun decisiva entaifer curt temp. Walti ha affirmà en la communicaziun, ch'el haja fatg bunas experientschas cun la nova direcziun da la partida dal cusseglier dals chantuns Thierry Burkart. El veglia era vinavant sa participar activamain a la lavur da la partida.
Tgi che succeda ad el n'è anc betg enconuschent. Sco'i ha num en la communicaziun, vegnia il process da chattar insatgi lantschà il schaner.
