Siglir tar il cuntegn

Header

cuntegn

Per l'emprima giada Cussegl federal activescha stab spezial asil «Sonas»

En vista dal dumber adina pli grond da persunas ucranaisas che bandunan lur patria e tschertgan protecziun en Svizra ha la ministra da giustia e polizia, cussegliera federala Karin Keller-Sutter, activà per l’emprima giada il stab spezial asil «Sonas».

Quest organ politic-strategic da la Confederaziun aveva il Cussegl federal gia fundà il 2011. Fin uss n'è el anc maina stà en funcziun. Il Sonas duai gidar a dumagnar las sfidas en connex cun la guerra en l'Ucraina – sco per exempel guardar che la Svizra reagescha a moda coordinada sin la situaziun che sa mida. Gievgia vul il Sonas sa radunar per l'emprima giada.

3,5 milliuns persunas en fugia – 11'000 en Svizra

Enfin glindesdi hajan circa 3,5 milliuns persunas bandunà l'Ucraina. Dapli che 11'000 dad ellas sajan en il fratemp s'annunziadas en Svizra tar centers federals per requirents d'asil, sco il Departament federal da giustia e polizia scriva. Sco quai ch'il Cussegl federal ha decis avant bun 10 dis survegnan tut quellas persunas il status da protecziun S. Entras quel han ellas in dretg da dimora per in onn e dastgan era lavurar en Svizra. Quai procuria dentant era per grondas sfidas tar ils chantuns e tar la Confederaziun. I dettia da sclerir dumondas da la registraziun da l'alloschament e da la tgira sco er davart la segirtad. Il stab spezial d'asil duai en quellas dumondas cussegliar la regenza svizra.

Sco quei ch’il Departament federal da giustia e polizia ha annunzià vegn il stab manà da Christine Schraner Burgener, la scheffa dal secretariat da stadi per la migraziun (SEM).

Christine Schraner Burgener
Legenda: Christine Schraner Burgener maina il stab spezial asil «Sonas». Keystone
audio
Per tadlar curt e cumpact
ord RTR Audio dals 21.03.2022.
laschar ir. Durada: 1 minuta 9 Secundas.

RTR novitads 15:00

Artitgels legids il pli savens

Scrollar a sanestra Scrollar a dretga