Tschertas vischnancas cumbattan cun pretschs enorms da terren e paucas abitaziuns disponiblas, autras han gist il problem cuntrari: Depopulaziun ed abitaziuns e chasas vidas. Per far frunt a questa sfida ha l'Uffizi federal per abitaziuns e la Gruppa svizra per las regiuns da muntogna elavurà in mussavia.
12 exempels concrets da project reussids duain dar inspiraziun e procurar per impuls. Tranter auter purtretescha il mussavia er dus exempels dal Grischun:
- La cooperaziun «abitar enfin 25» da Samedan che porscha spazi d'abitar pajabel per la giuventetgna.
- La cooperaziun da Lantsch che ha realisà ina chasa cun 8 abitaziuns pajablas per famiglias.
La finamira saja clera, ha declerà il cusseglier federal Guy Parmelin avant las medias: Las regiuns muntagnardas stoppian restar attractivas. Ed i dettia tuttavia schliaziuns – er sche las cundiziuns da basa sajan actualmain difficilas.
Uffizi federal d'abitaziuns:
E Martin Tschirren, il directur da l'Uffizi federal d'abitaziuns agiunta: Forsa han bleras vischnancas mess ils ultims decennis la prioritad sin stgaffir novas plazzas da lavur ed han gì il sentiment che las persunas che vegnan a lavurar chattan ina dimora. Quai na saja dentant betg il cas. Las vischnancas possian sezzas influenzar il martgà d'abitaziuns. Saja quai via la planisaziun dal territori e la creaziun da zonas spezialas per abitaziuns d'utilitad publica ni cun sezzas construir ni sustegnair projects.
